Wol vf tanzen vberal

Wol vf tanzen vberal·
froͤit úch stolzen leigen·
wunneklichen stat der walt·
wol gelǒbet dc sint liebú mere·
iarlang pruͤuet sich der schal·
gegen dem liehten meigen·
da die vogel vberal
singent wol zergangen ist ir swere·
alle vber ein planúre·
die blv̊men sint entsprvngen·
elliv creatúre
dú mv̊sse da von ivngen·
wil ein wib so wirt mir wol nach der ie min herze hat gerungen·

Zergangen ist der leide sne·
von der gruͤnen heide·
komen sint vns die blv̊men rot·
des froͤit sich dú werlt ellú gemeine·
dar zv̊ viol vnd kle·
liehte ǒgen weide·
mt den wunnen ist mir we·
dc kan nieman wenden wan alleine·
dú mich heisset singen·
der zimt wol dc lachen·
sol mir wol gelingen·
dc mv̊s ir gvͤte machen·
von ir schulden mv̊ssen noch tusent herzen vnd dannoch mere erkrachen·

Dú mir an dem herzen lit·
die sach ich so schone·
an einem tanze da si gie·
wol mit eren bi den schonen frowen·
ich wart fro der selben zit·
got ir iemer lone·
dc si mich so wol enpfie·
solde ich si noch einest also schowen·
die vil tvgentrichen·
so were mir wol zemv̊te·
ir kan niht gelichen·
vil selig si dv́ gv̊te·
nach ir minnen ist mir we· noch ist dú werlt gar vngemeiner hůte·