Wol mich dirre ſtunde
[83r]
Wol mich dirre ſtunde·
die ſolde ich enpfahen·
mit geſange es iſt rehte an der zit·
ob ich dc wol kvnde·
dar ſo ſolde ich gahen·
wan hoͤꝛet vogel ſingē widerſtrit·
dar zv̊ dꝛingent[WS 1] dur dc gras·
blůmē manger leie·
ich kan ſelbe da dc wc·
willekome her meýe·
mir vn̄ ǒch der frǒwē min·
ich wil ſin·
ſwie ſo ſi gebútet mins h̾zen troͤſt̾in·
Herzelieber mere·
der warte ich vil dike·
vō der mineklichē frowē mī·
ich were ane ſw̾e·
wan dc ich erſchꝛike·
dvr die lieben trage ich ſenden pin·
dc iſt endeliche war·
liebe nimt die ſīne·
liebe machet miſſevar·
wiſſent dc ich bꝛinne·
in der liebe als ein glv̊t·
frowe tůt·
wol an mir vil tumben deſwar ſo ſit ir guot·
Wer ich niht ein tvmber·
ſo lieſſe ich min ſingen·
ſit es iſt der lieben gar ein wint·
ich han groſſen kvmber·
den mag ſi wol ringen·
frowe vs ſendē ſoꝛgē mich enbint·
ir ſvlt mir genedig weſē·
lieb mins h̾zen wūne·
ſo mag ich vil wol geneſen·
liehtú ſpilndú ſvnne·
troͤſtēt mich vil ſendē man·
ſit ich gan·
iv wol aller eren gedenkent wol daran·
Owe ſender ſoꝛgen·
ſwie ſo ich gebare·
doch tůt ſi mir an dem herzē we·
die trage ich v̾boꝛgen·
ſtille vn̄ offenbâre·
diene ich ir was wil dú liebe me·
wil ſi ich ſinge ir wil ſi ich ſage·
wil ſi ich trure ich lache·
ich weis wol der liebē klage·
ich diene ir zeſwache·
frowe mīne fuͤgent dc·
das mir bc·
tů min troͤſterinne der ich noch nie v̾gas·
Mit zwein blanken armē·
ein vil lieplich twingē·
iſt mir ſendē knehte wilde gar·
ſi ſol ſich erbarmē·
nach dē ſelbē dingen·
iamert mich got gebe dc ichs ervar·
tǒgen mīne iſt mir vnkūt·
lieplich twingen túre·
wil ir roſevarw̾ mvnt·
ſo froͤwe ich mich húre·
troͤſtēt frowe eſt an der zit·
ſoꝛge lit·
mine h̾zen nahe· des ir gewaltig ſit·
Anmerkungen (Wikisource)
- ↑ Vorlage: dꝛingen.