Wol her kint ir helfent singen
[258r]
Wol her kint ir helfent singen·
loben des svͤssen meien werdekeit·
sine kraft siht man vf dringen·
gegen der sunnen dur die bǒme breit·
alle wolgemv̊ten leien·
die gesâhen einen meien·
nie mit richer varwe bas bekleit·
Wol den kleinen vogellinen·
wol der heide wol den liehten tagen·
die svln vns ze froͤiden schinen·
man siht blv̊men vf der heide wagen·
rôsen hant niht grôsser noͤte·
si stant in ir besten roͤte·
als es gruͤnem hage sol behagen·