Wol dir svmer diner schoͤne

Wol dir svmer diner schoͤne·
sid din rat der vogele doͤne·
weket vnde machet frůt·
wer kan dich vol loben iemer·
wan din kvnft erwindet nemer
si git manger hande blůt·
wis· gel· bla· brvn· vs esten
dringent wunnenklichen als· e·
doch mag ich mich des wol gesten
das ich dienen wil der besten·
wie es mir dar vmb erge·

MIr ir ist ein lant beschoͤnet
dv́ min herze hat bekroͤnet·
vnd ǒch machet sorgen vri·
si ist kv́sch noch tugendenriche
in gesach nie minnenkliche
bilde· wússent danne si·
zv̊ ir kan ich nit gemessen
dv́ mir ie so nahe lag
si hat mich also besessen
das ich ir nit kan vergessen
beidv́ nacht vnd ǒch den tag·

Schoner creatur vf erde
nie betagte nach dem werde
mv̊s ich ringen svnder spot
das gebv́tet mit dv́ minne
willekliche vs vnd inne
wil ich leisten ir gebot·
das si die vil svͤssen binde
als si mich gebvnden hat
alder mich vs sorgen winde
ob ich die genade vinde·
was da kvmbers mir zer gat·


I wil der sumer hinnan scheiden·
II Langes miden von der suͤzen·^{[WS 1]}

Anmerkungen (Wikisource)

1. Diese zwei Zeilen stehen ganz unten rechts.