Wol dem meien (Mit originalen Lettern)

Wol dem meien·
wol der wūne·
wol d̾ ſvm̾lichē zit·
tanzen reien·
ſwer dc kv̄ne·
der ker vf den anger wit·
da ſvn wir dē meien gruͤſſen·
ſingē der vil reinē ſvͤſſen·
dú kan machē·
h̾zen lachē·
ſingēt alle wid̾ſtrit·

Wol ir hendē·
wol ir wange·
wol ir húfeln roſen rôt·
getoꝛſte ich ſendē·
mit geſange·
minú leit der ich ie bot·
minē dienſt mit gantzen trúwē·
den wil ich ir ierlich núwē·
dc dú reine·
die ich da meine·
ſcheide mich vō ſender not·

Wol ir ǒgē
wol ir mvnde·
dú gent liehter varwe ſchin·
ſwer nv tǒgen·
blikē kvnde·
dē wolde ich die frowē min·
zeigē dc er ſi geſehe·
vn̄ er bi dem eide iehe·
dc ſi zware
in eime iare·
ſo ſchôn niht moͤht gebildet ſîn·

Wol ir bꝛawē·
wol ir kīne·
wol ir kel ſo lilien var·
ich mv̊ſ grawē·
ald ir mīne
tvͤge mich an ſoꝛgē bar·
ſeht dē tůt ſi vngeliche·
dú vil reine ſelderiche·
we mir armē·
âne erbarmē·
diene ich ir mit trúwē gar·

Wol ir libe·
d̾ ſo ſchone·
nach dē wūſche ſi bereit·
got nie wibe
gab die krone·
die ſi an ir libe treit·
ſvm̾ kleit hat er ir geſnittē·
ſelde vn̄ zvht nach wibes ſittē·
hat dú reine·
die ich da meine·
dc ſi gar mit zúhten kleit·