Wis willekomē wūneklich̾ meie

Wis willekomē wūneklich̾ meie·
wan dú froͤweſt manig h̾ze das ê trurig was·
din kvnft wil fromē dc vil manig reie·
wirt geſvngē da die blůmē dꝛingent dvr dc gras·
da bi ſingēt vil der vogellin·
ſuͤſſe doͤne gegen der ſchoͤne din·
Hohgemvͤte·
git ir wibeſ guͤte·
mir gegen ir·

Die ſelderichen mīne ich ſender tǒgen·
in dem h̾zen wan mit wart ſo liebes nie niht kunt·
gar lachelichen ſtent ir ſpilndē ǒgen·
ah wie gar zekuſſe ſtet ir wol geroͤter mvnt·
wie gar wol geſtellet iſt ir lib·
ach ich meine dc vil reine wib·
Hohgemvͤte·
git ir wibeſ guͤte·
mir gegen ir^{[WS 1]}·

Dú ſuͤſſe mīne mīnet mich trúwē·
das ſi mir ſo gar an die vil mīneklichē riet·
min rehtē ſinne darf es niht gerúwē·
dc ſi ſint an ir von der min h̾ze nie geſchiet·
we wes moͤhtenſ anders han gegert·
die ich kroͤne dú iſt ſchoͤne wert·
Hohgemvͤte·
git ir wibeſ guͤte·
mir gegen ir·^{[WS 2]}·

Min lieb min frowe miner ǒgē wūne·
gar d̾ hohſte troſt gegē froͤidē d̾ mir ie wart kūt·
min trut ich ſchowe dich fúr ellú kúnne·
lieber minē h̾zen wan dv biſt gelúkeſ vunt·
dv biſt meiſterin an wibeſ zuht·
ich wil gruͤſſē dich vil ſvͤſſē fruht·
Hohgemvͤte·
git ir wibeſ guͤte·
mir gegen ir·^{[WS 3]}·

Genade ſende mir genedeklichen·
h̾zeliebe^{[WS 4]} ſvͤſſe frowe reine ſelig wib·
min ſoꝛge wende mir vil ſoꝛgērichen·
ſit ſo gar genedig iſt din minneklicher lip·
ſwie ze troſte mir din roter mv̄t·
wil ſin lachen lieblich machen kvnt·
Hohgemvͤte·
git ir wibeſ guͤte·
mir gegen ir·^{[WS 5]}

Anmerkungen (Wikisource)

1. Vorlage: Hohgemvͤte·
   git ir wibeſ guͤ.
2. Vorlage: Hohge.
3. Vorlage: Hohge·
   git ir.
4. Vorlage: h̾zelie.
5. Vorlage: Hohge.