Wie es vor Rastat mit den Pauren ergangen ist
Nun woelt jr hoeren ein newes gedicht / vnd was vor Rastat geschehenn ist / woll von den kropfften pawren / im Pintzgaw habenns sys angefanngen / so gar an alles trawren ja trawren.
Nun mercket jr herren der pauren rad die Rastatter lanndtschaft handt aufbracht / seind für die stat gezogen / sy haben tag vnd nacht geschantzt / ist war vnd nit erlogen ja logen.
Die pauren vorderten auf die Stat / in dreyen stunden was jr radt / solt man die stat aufgebenn / vnnd wa das nit geschehen wurd / so gult es jn ir leben.
Was hetten jn die paurenn erdacht / vonn loerchem holtz ein Byxenn bracht / mit eysenn rayffenn vmb bundenn / sy war wol achtzehen schuoch lanng / die maur hats nit entpfunden ja pfunden.
Die pauren theten einen sturm / mit langen laytern das het keyn furm / die maur was nit beschossen / merckent was das für kriegsleüt seind / es thet jr leben kosten.
Ein Hauptman heyßt der Setzenwein / er sprach zun pauren an der gemeyn / die maur laßt sich nut vmbstossen / so kan ich nit mit dem kopf hindurch / wir werden legen ein plossen ja plossen.
Wolt jr das ich die Stat bestürm / so legt mir zuo geschütz vnd Schürm / das ich die stat müg bschiessen / wo jrs nit thut so ists vmb sonst / das thet die paurn verdriesesen ja driessen.
Die pauren gaben jm den lon / deßgleichen dem Prouosen schon / es galt jr beden leben / ja wer sich vnder die pauren mischt / dem wirt sein lon auch geben ja geben.
Die pauren begerten weyb vnnd kind / hyn auß fürs thor nur also gschwind / sy woltens also machen / wol mit den burgern in der stat / das sys nit wurden lachen ja.
Sy woltens vber die maur auß werffen / wol nach der leng vnd nach der scherffen die burger waren weise / sy theten als fromb redlich lewt / jr lob thun ich da preisen.
Es ist der pauren maynung gewesenn / keyn lantzknecht solt vor jn genesen / sy woltens all erhencken / darumb jr liebe lantzknecht guot / thuots den pauren eintrencke.
Der Schitter auff der jenickaw / der hatt zwelff soeld vnd groß vertraw / ein oberster ist gewesen / er hat die lantschaft wol geregiert / das sicht man yetz gar eben.
Ein hauptman heyßt der Lienhart Heyd / er hat seyn teyl was manchem leyd anfant Johanns tag ists geschehen / sy wurden geschossen vnnd geschlagen / hat mancher lantzknecht gesehen ja gsehen.
Der Michel Gayßmayr was ein hauptman / er mocht mit eeren nit bestan / er ist ein schalck für trauren / er hat das Etschland aufruerig gemacht darzu der Pintzgar pauren ja pauren.
Ein Edler herr zu Rastatt wont / mit namen graff Christoff ist er gnannt / ein reitter ist er geborn / er hat die stat gar wol behuet / thet den panren zoren ja zoren.
Noch eins jr pauren nempt für guot / behalt ewern leyb in guoter huot / thuot fürbas daheim bleiben / gebt ewern herrenn was jn zuosteet / so thuot man ewch nit vertreiben ja treiben.
Nun welt jr pauren zufriden sein / so bleibt jr billich wol daheim / bey ewern kindenn vnnd weibenn / dasselb laßt ewch zu hertzen gan / man thuot ewch vberwindenn.