Werder grůs von vrowen munde

Werder grůs von vrowen munde·
der froͤit vf vnd vf von grunde·
bas danne al der vogele singen·
kan aber ieman vro beliben·
anders iht wan bi den wiben·
furder swer des habe gedingen·
wc gelichet sich dar zv̊·
der nv wunne
pruͤuen kvnne·
der sage wc im sanfter tů·

Si ist so gůt dc ich wol swuͤre·
der dú riche gar dvr fuͤre·
von dem orte vnz an dc ende·
der envunde ir niender eine·
div mich alse rehte reine·
dvhte an alle missewende·
ob si nv dú beste si·
nein si herre·
dest ir verre·
sin entv̊ mich sorgen vri·

Wilent vraget ich einer mere·
wc vúr truren senfte were·
dc wolt ich vil gerne schowen·
do volget ich der wisen rete·
dc es niht so sanfte tete·
so dú vroide von den vrowen·
dc ist mir von ir beschehen·
svnder lǒgen·
swc dú ǒgen·
ganzer tvgende hant ersehen·