Weder iſt es v́bel oder iſt es gv̊t
[144r]
Weder iſt es v́bel oder iſt es gv̊t·
das ich min leit verhelen kan·
man ſiht mich dike wol gemv̊t·
ſo trvret manig ander man·
der minen ſchaden nie halben gewan·
ſo gebare ich dem geliche·
als ich ſi vꝛoͤiden riche·
nv mv̊s es got gefvͤgen ſo·
das ich von waren ſchvlden werde vꝛo·
Wie[WS 1] kvmet das ich ſo menigen man·
von ſiner not geholfen han·
ſit ich mich ſelben niht enkan·
getroͤſten mich entriege ein wan·
ich minne ein wip dv́ iſt gv̊t vn̄ wol getân·
die enlat mich aller rede beginnen·
ich kan aber endes nit gewinnen·
dar vmbe were ich nv verzaget·
wan dazs ein wenig lachet ſo ſi mir verſaget·
Si ſehe das ſi innen ſich bewar·
ſi ſchinet v̂ſſen froͤidenrich·
das ſi an den ſitten iht irre var·
ſo wart nie wip ſo mineklich·
ſo ſtet ir lop vil frǒwen lobes [144v] ein wiht·
iſt ſi nach ir wirde gefvrrieret·
die ſchoͤne die ſi vzen zieret·
kan ich ir denne gedienen iht·
des wirt bi ſelkē eren ungelonet niht·
Swie noch min froͤide an zwîuel ſtat·
den mir dv́ gv̊te mag vil wol
gebvͤſſen· ob ſis willen hât·
ſon rv̊che eht waſ ich kvmbers dol·
ſi vꝛaget des mich nieman vꝛagen ſol·
wie lange ich welle bi ir beliben·
ſi iſt mir iemer voꝛ allen wiben·
ein wernder troſt ze froͤiden mir·
nv mvͤze mir geſchehen als das ich globe an ir·
Gnv̊ge kvnnen deſte bas·
gernden dc ſi bi liebe ſint·
ſwie dike ich ir noch bi geſas·
ſo weſſe ich minner danne ein kint·
ich wart an allen minen ſinnen blint·
des wer ich anderſwa betoͤꝛet[WS 2]·
ſi iſt ein wip dv́ nit gehoͤꝛet·
vn̄ gv̊ten willen kan geſehen·
den han ich ſo iemer mvͤze liep geſchehen·