Was verzagten h̾zen hat min lip
[58r]
Was verzagten h̾zen hat min lip·
das ich ir nie geſagte noch den willē min·
dú mir lieber iſt danne ellú wib·
vnde iemer mv̊s vnendelichen lieber ſin·
ich ſinge ir alle mine tage·
deſwar des beſtē ſo ich mich v̾ſinne·
ſine weis aber dc ich vō ir ſage·
vn̄ dc ich ſi ſo herzecliche mīne·
mit der not trute ich ie mins h̾zen kv́niginne·
Ich hete ir doch vil lihte ein teil geſeit·
der vil groſſen liebe ſo min h̾ze an ſi hat·
wā dc mich ir vil hohú w̾dekeit·
niht an ir vollekomen lib genenden lat·
ir ere vn̄ mine ſchamriches gern·
hat an vns nv das froͤmden gar gemachet·
des mv̊s ich maniger froͤide enbern·
dc ſi mir vō h̾zē ſelten lachet·
vn̄ doch min ǒge in ir namē alſe dike erwachet·
Swenne ich bi der hohgemv̊tē bin·
dú mir ane ir wiſſende nimt die ſinne gar·
ſo nemēt ir ſpilnden ǒgen hin·
ſwas ich vf genade ſolte ſpꝛechen dar·
ſol ich die langē ſvͤſſen not·
nach minē willē iemer iht v̾enden·
ich mv̊s vn̄ mv̊s wer es min tot·
mins h̾zen bete ein woꝛt an ſi genendē·
ſit min leit niht wā ir mīne kan erwendē·
Getoꝛſte ich iv mins willē ſagē·
frǒwe al dar nach mich úwer mīne twinget·
ſo moͤhte ú wol min ſpꝛechē klagen·
vil manige not da mit min herze ringet·
da vō das ir mir lieber ſit·
danne ieman in der w̾lte ſi·
vn̄ iv min leit ſo verre lit·
dc mir da wont ſo nahē bi·
des wintert mir dú ſvm̾ zit·
IR ſvlnt mir ſelig vꝛowe ein woꝛt·
v̾nemē genedeclich ob irs gerůchēt·
ich bin bekvmbert hie noch doꝛt·
mit valſch̾ minne als es die valſchen ſůchent·
ich mīne úch vn̄ mint úch ie·
dc ſvlt ir wol gelǒben gar·
ir ſit mir voꝛ in allē hie·
da man des h̾zen wirt gewar·
dar an vernv́ gert ich nie·
Were an der mīne valſches iht·
da mit ich iv mins herzē frowe meine·
ſon enzeme ǒch iv min ſingen niht·
hete[WS 1]
iemē mere ein woꝛt mit iv gemeine·
mir hat ǒch alle vnſtetekeit·
Frowe úwer w̾der lib benomē·
ſwas iv min ſanc deſ willen ſeit·
dc iſt im vō dem h̾zen komē·
gelǒbet ir dc ſo enhabe ich leit·
Ich wil ſingē vn̄ lachē·
ſwanne ich ſihe dú mich betwūgen hat·
ir genade mir mv̊s wachē·
ſol der minē ſoꝛgē werden rat·
ſi ſehent min ǒgen· daſt vnlǒgen·
die ich lieber han danne alder kriechen bǒgē·
Si iſt mir lieb ane alle vnſtete·
wan ſin wart nie valſcher minne wert·
gerne ich ir genadē bete·
der ich ie mit trúwē han gegert·
in ir gewalden mv̊s ich alden·
vn̄ wil an ir min trúwe alſo behalden·
Lieber hete ich vō ir lone·
niht wan ein vil kleines vingerlin·
danne dc rich vn̄ ǒch die krone·
mit der fúrſtē willē w̾e min·
der iſt doch kleine· wan min eine·
die des wenē dc ich ſi mit trůwen meine·
Minnekliche ich vō der minne ſvnge·
londe ſi mir mines ſanges bas·
dc mir eteſwenne wol gelvnge·
wolte ſi bedēken mīne bas· dc ich bin·
der ir vil menge ſtvnde· lob gehohen kvnde·
lies eht ſi belibē a minen ſin·
Ich wil nv dien wol gemv̊ten ſingen·
dien noch rehte froͤide ſanfte tv̊t·
wer ſol dien v́zagten froͤide bꝛingen·
die man ſelten vindet wol gemv̊t·
lat ir mich den gv̊tē froͤide machen·
die doch gerne lachē·
lat die valſchē trurenſ nietē ſich·
Hohte nv der wol geloptē gvͤte·
minē mv̊t der ie nach froͤiden ſtreit·
ſo lieſ ich vil trureklich gemvͤte·
dc mir ſchadet an miner w̾dekeit·
hoher mv̊t der lat vil ſeltē ſoꝛgen·
der iſt mir v̾boꝛgē·
ob ſi niht genedeklichen tůt·
Wol mich des tages vn̄ ǒch der zit·
dc mir vō der ſeldenrich alſo beſchach·
dú mir da ze herzen lit·
dar nie gv̊teſ wibes ǒge in me geſach·
da reht in mins herzen kraft·
lebet dv́ w̾de ſchone· mit gewaldeſ crone·
dc tv̊t mir d̾ mīne meiſt̾ſchaft·
Der minne manicvalde rat·
riet mir ſelig frowe an dinen w̾den lip·
dvrh das din reines herze hat·
ganzer tvgende me danne in der w̾lte ein wib·
frowe ich bin din ſteter wer·
libes vn̄ ſinne· ſo dc ich dich mīne·
mer danne iema valſch mīne ger·
Ia bin ich valſcher mīne fri·
wider dich frǒwe al mins h̾zen ſelekeit·
vn̄ dc dú liebe ſtete ſi· die wile ich lebe·
ſo hat mir min ſin geſeit·
ich wil frǒwe in minen tagen·
dich mit trúwen meinē· dich lieben dich reinen·
dc ſol mir din hoher mv̊t v̾tragē·
Min tvmbes ſendeſ ouge ſihit·
leider ſelten dc min h̾ze minne gar·
dc iſt din lip vn̄ anders niht·
der mich frǒwe machet dike miſſevar·
ich mv̊s leider vn̄ ſol· dur der lúte niden·
dich zeſehenne midē·
das tv̊t mir we vn̄ niender wol·
Ich enweis wc ich dir anders ſage·
wā dc ich dich mīne vn̄ iem̾ mīnen mv̊s·
min meiſte not vn̄ al min klage·
iſt dc mich ſo ſelten froͤit din w̾der grůs·
des trage ich vil manig ǒwe·
nahe mir verboꝛgē· ich bin tvſent ſoꝛgē·
dvr din frǒmden richer nv danne ê·
Mir ſeit ein ellender bilgerin·
vngevꝛaget vō der frǒwē min·
wie ſi ſchone were· vn̄ da bi wol gemv̊t·
dc iſt mir ein mere·
dc mir an dē h̾zen ſanfte tv̊t·
Got der gebe der lieben gv̊tē tag·
der ich anders niht gegruͤſſen mag·
alſo ſpꝛiche ich iemer·
wider dē moꝛgē frů·
vn̄ v́giſſe ir niem̾·
wid̾ dē abēt gv̊ter naht dar zv̊·
Miner ſinne ich halber da vergas·
do ich vrlob nam vn̄ ſi ſo ſaſ·
ſi bꝛan vf ſchone· ſam der abent rot·
wirt mir iht ze lone·
daſt vnder ſnitten gar mit ſender not·
Si bat mich do ich ivngeſt vō ir ſchiet·
dc ich ir ſande minv́ ſenden liet·
die wolte ich ir ſendē· nv enweis ich bi weme·
ders ir wiſſen hendē·
ſchone bꝛinge vn̄ mir zeboten zeme·
Was ob mich ein botte v̾ſvmet gar·
ich wil me danne tvſent ſendē dar·
[58v] ſo ſi ir alle bꝛingent· den vil ſvͤſſē ſang·
vn̄ in ir ſchone ſingent·
ſo wirt mir vil ihte ein habedanc·
Ich wil in miner frǒwē namen·
lobē vn̄ eren iemer ellú wib·
wand ſi mit gv̊teſ wibes ſchamē·
wol bekleidet hat ir hoͤveſchen lip·
des hat ſi gar den beſten pꝛis·
maniger w̾der tvgent des wer ich gerne ir amis·
Ir amis hîeſſe ich gerne alſo·
dc mir ir genade were bi·
vn̄ ſi mins heiles were fro·
ſeht ſo wurde ich niemer ſelden fri·
wan nimt ſi ſelig wib des war·
das min ſinne vn̄ min ſenden ǒgē merkēt dar·
Min merken dc iſt gar v̾loꝛn·
wan ſin weis noch enfraget miner not·
ǒch fúrhte ich ir gewaltes zoꝛn·
wirt ir ſcham vō miner bete iht rot·
min zvht wart nie gegen frowen balt·
ſo ich des engelden ſo geſchiht an mir gewalt·
IR gewalt der ich eigen bin·
git mir ane ir wiſſende ſenden mv̊t·
wolde ſi mineſ heiles gernde ſin·
niemā dvnket alle ir lob ſo gv̊t·
ſwies minen willē nie geſpꝛach·
ſi iſt mir lieb vn̄ lieber danne iht des ich ie geſach·
Owe das ichs mit der lieben ie begv̄de·
vn̄ owe das ich ſi îe geſach·
ſi hat mir geſpꝛochen vs ir roten mvnde·
eineſ dc mir in min h̾ze bꝛach·
des kan mit niht w̾den rat·
es hat ſich geſenket alſo hin ze grvnde·
dc min froͤide nach ein ende hat·
We wes hat ſich dú liebe an mir gerochen·
oder wie han ich gedienet dc·
das ſi hat ſo vil der froͤide an mir zerbꝛochē·
vn̄ ich ir mit trúwē nie vergaſ·
dan enwas ich ir niht w̾t·
we wc han ich tvmber man mich ſo v̾ſpꝛochē·
das ich gv̊tes wibes han gegert·
Ich wil gegen der lieben ſingē vmb ein [59r] ſcheiden·
vn̄ wil doch noch ſand ir teilē ê·
also han ich geteilet ſchiere vnſ beidē·
ir ſi wol ſo ſi mir iemer we·
ſi habe ir dc herze min·
ſo belibet mir dc ich in ſenden leiden·
iemer mv̊s bis an min ende ſin·
Ich wande ie dc ich ein teil der w̾lte w̾e·
nv habe ich die wârheit wol erſehen·
das ich bin der lieben alſo gar vnmere·
We wie koͤnde leider mir geſchehen·
mih betrǒg ein tvmber wan·
owe tot daſt ie ſo lange mich verbere·
ſit ich ſelber min geſpottet han·
Owe was froͤideloſer zit ein man v̾ſwendet·
der nv minnet als ich tv̊n ein wib·
ſi hat mit ir ſchoͤne hohe mih gepfendet·
ǒ we wan wiſt ǒch nv ir reiner lip·
ī min h̾ze eht alſe gar·
ſo wurde eſ nach minē willē ſo verendet·
des ich ſus gedenkē nien getar·
So dú nahtegal ir ſang·
núwet gegē der ſvm̾zit·
vn̄ eſ ſvnd̾ rifen dank· alleſ gruͤne in vroͤidē lit·
ſo manent mich die liehtē tage·
miner altē ſendē klage· ǒwe minne dc din rat·
mir den kvmb̾ ie gebot· vn̄ mich din helfe lat
v̾derbē dc iſt mir ein not·
Not vn̄ angeſt ſint da bi·
ſwa dîv mīne vf trúwe ſtat·
der enwirde ich niemer vꝛi·
wāde ſi gar vō h̾zē gat·
die ich gegē der lieben han·
ſvnd̾ valſch vn̄ valſchen wan·
Als mis heiles oſt̾ tag· deſt ir vollekomen̾ lib
dú mich wol getroeſtē mag
bas dāne ī der w̾lte ein wib·
IR wol erenricheſ leben·
die ich da mīne vn̄ midē mv̊ſ·
hat mir ſoꝛgē vil gegeben
der mir niemer wirdet bv̊ſ·
han ich vō ir reinē ſittē·
froͤide ein teil dar in geſnittē·
ſo iſt ie doch des einē me·
wād ich vngetroͤſtet bin·
es tůt ir froͤmdē mir ſo we·
vn̄ v̾derbet mir den ſin·
Jſt dc ich v̾derbē ſol·
vō ir vngenadē gar·
ſo tůt mir doch vō h̾zen wol·
dc min trúwe ie diente dar·
vn̄ iemer g̾ne diene wil·
die wile ich lebe vnz vf dc zil·
endet ſi min vngemach· niwā den truwē min·
ſeht ſo wirt min trurē ſwach·
dc mv̊ſ doch min gedinge ſin·
Si ſol wiſſen dc dú not·
mir naher dāne ze herzē gat·
vn̄ iſt mineſ heiles tot· ob ſi ſtete alſo beſtat·
dc ich lange vꝛemdē mv̊ſ
verbirt mich dāne ir werder grůſ·
ſo gelǒbe dc min leit leider vō ir meret ſich·
deſ búte ich ir minē eit·
vil ſchoͤne nv bedenke mich·
Jvnge vn̄ alt ir helfent alle froͤide meren·
dc dú welt noch w̾de fro·
niemā kan fúr truren beſſerſ niht geleren·
dc weis ich fúr war alſo·
volget ſwer iv gebe den rat·
da mit ir ſo grôſſē froͤide mvget v̾keren·
da dv́ welt mitte vmbe gat·
Wir ſin beſſer fro ſo wir nach tvgenden ringē·
dāne ſo wir trurēklichē leben·
fúr die ſoꝛge ſvln wir tanzē vn̄ ſingē·
diſen rat wil ich iv geben·
Ich bin des gedingē vꝛo·
dc mir an der lieben ſol gelingen·
dú mich hat betwungē ſo·
Niemā kan mit ſw̾en mv̊te·
niht v̾enden· ich bin vf genade vꝛo·
ſelig wib ir ſult an mich genade wendē·
ſo ſtet mir daſ h̾ze ho· ir ſit wol dar zv̊ geſtalt·
dc ir mv́get in trurig h̾ze froͤide ſendē·
vꝛoͤidē vil habet ir gewalt·
Urowe mir hat ivwer ſchoͤne vnde ivwer guͤte
trvrē vō dem h̾zen bꝛaht·
ſelig wib nv troͤſte ſchiere min gemvͤte·
alle tage vn̄ alle naht· ſo v̾giſſe ich úw̾ niht·
dar zv̊ wúnſche ich das dú ſelde úch wol behvͤte·
ſwie ich mir vō ú geſchiht·
Mich enwil der lieben guͤte niht erlaſſen·
ich betrahte ir werdekeit·
ſon enkvme ich leider niend̾ ir ze mâſſen·
ſi iſt mir ze hoh ze bꝛeit·
doch mag ich des niht v̾lan·
ſi ſi iem̾ min geverte vf allē ſtraſſē·
dc ich ir niht v̾geſſen kan·
Anmerkungen (Wikisource)
- ↑ Vorlage: hete hete.