Walt heide anger vogelſingen

Walt heide anger vogelſingen·
ſint verdoꝛben von des kalten winterſ zit·
da man blv̊men ſach vf dꝛingen·
da iſt es blos nv ſchǒwent wie dú heide lit·
dc klage ich ſo klage ich mine ſwere·
dc ich der vnmere·
bin der ich gerne lieb in herzē were·
frowe minne dc iſt alles din gewalt·

Bar min herze ie^{[WS 1]} bernder wunne·
dc wc ſwenne ich ſach ir wunneklichē ſchin·
vn̄ ir ǒgen ſam der ſvnne·
dvr min ǒgen lvhten in dc herze min·
dar nach wart mir leit in kvrzen ſtvnden·
owe minne wundē·
wie haſt dv ſus dich^{[WS 2]} min vnderwundē·
dc ich ſender ſiecher bin noch froͤiden bar·

Bant dú mīne mich der ſvͤſſen·
vn̄ lat die vil lieben ſvnder truren gan·
minne wie wilt dvs gebvͤſſen·
minne ich hans da für^{[WS 3]} es ſi niht gv̊t getan·
minne hilf enzit ich mv̊s verderben·
vn̄ an froͤiden ſterbē·
ſol ich niht den roten kvs erwerben·
ſo iſt mir froͤiden ſtraze in rúwen pfat gebant·

Los in rehter wibes gvͤte·
ſach ich zeinem male ir kúſchen wibes lip·
da vō froͤit·
ſich min gemvͤte·
dc ich dâchte ia dv reine ſelig wib·
dv maht mir wol minen kvmb̾ wenden·
vn̄ helfe ſenden·
frǒwe minne troͤſtent mich vil ſenden·
wan ich ſtan von úweren ſchulden froͤide los·

 Wer kan mich nv fro gemachen·
nieman dan ir minneklicher roter mvnt·
will mir der von herzen lachen·
da von wirde ich ſender ſiecher wol geſvnt·
gv̊ten wip nv ẃnſchet dc dú here·
mich die ſtrâſſe lere·
wa ich vſſer leide in liebe kere·
minne hilf das mich dv́ liebe ir liebe wer·

Anmerkungen (Wikisource)

1. Vorlage: in.
2. Vorlage: dich′′ ſus′′.
3. Vorlage: fú.