Wafen wie bin ich geſcheidē

Wafen wie bin ich geſcheidē·
vō der lieben die ich da minne·
wafen wie habe ich gevarn·
des lebe ich in ſendē leidē
ſi hat herze vn̄ al die ſinne·
d̾ mv̊s ich mich gar enbarn·
ich enmac niht fro geſin·
ſi hat doꝛt min h̾ze in banden·
deſ lide ich in froͤmeden landen·
vō ir ſchuldē ſenden pin·
 
Sehe ich die vil minneklichē·
noch in rehter liebe lachen·
ſeht ſo wurde ich hochgemv̊t·
wc da ſoꝛgē mv̊s entwichē·
ſi kans alſe ſv̊ſſe machen·
dc es mir gar ſanfte tv̊t·
in enmac ir niht geſehē·
voꝛ gebirge vn̄ voꝛ der verre·
niemā frage was mir werre·
ir mvgenz ane frage ſpehen·

IN geſach daſt ane lǒgen·
nie ſo liehtevarwe wangen·
noch ſo roſelehtē mv̄t·
noch ſo lieplich ſpilndú^{[WS 1]} ǒgen·
des mv̊s mich nach ir belangē·
ſo iſt mir leider gar vnkvnt·
ob ir herze iht iamers trage·
nach mir als nach ir das mine·
nein ſi mehte ſo ſcharpfe pine·
iht v̾dulden zwene tage·

Anmerkungen (Wikisource)

1. Vorlage: ſpilnden.