Wafen minne wie hast dv mir so getan

Wafen minne wie hast dv mir so getan·
solhen růf vnd klage ich noͤte von dir han·
wan dv wistest mich von des vngemach·
vnd riete des ist lange mir an ein wib·
das ich dar er gab· das herze vnd alle den lib·
we was ich do trostes mich ze dich ver sach·
dar dient ich sit das ich min stete nie zerbrach·
ǒwe leider das hat mich veruangen nicht·
wan das man mich trurig vnd verdorben sicht·
da von das mir helfe nie von dir beschach·

Nv trachte minne ob ich von dir dur not nit klage·
wa ist min froͤide hin vnd mine besten tage·
dest ane allen dank von dinen schulden vúr·
Got weis wol das ich mich nit versinnen kan·
sit das ich mis liebes minne alrest began·
das ich das mit keinen sachen ie ver lur·
das ich gegen steter minne· so wernd vnliebe spúr·
minne woltost dv mir noch ze statten komen·
swie grossen schaden ich diner sinne habe genomen·
wie gerne ich vf besserunge das verkúr·

Frǒwe minne ich wil dir noch getrúwen bas·
hilf dur dine guͤte mir erwerben das·
das mich dv́ liebe ir minne in solher mâsse wer·
das ich ir lieb echt inrent halb des^{[WS 1]} herzen si·
vnd si wilent tuͤge frúntlich gruͤssen bi·
vnd ich ir libes minne vf ir genade enber·
si muͤsse mich vergen ob ich ir anders ger·
lieb vor allem liebe selig vrǒwe min·
dur dine tugent so tů mir soͤlhe minne schin·
der bin ich din swie dv mir sist ze vollem wer·

Anmerkungen (Wikisource)

1. Vorlage: des des.