Von got ein magt erkorn
[295v]
Von[WS 1] got ein magt erkorn·
rose ane dorn·
des himel vnd der erden frǒwe·
des tieuels wider gang·
der helle twang· ein vang·
der iemer wernden wunnen· Schǒwe
div paradises porte wît·
ein vinderin der gnaden zit·
div vns loste von des tievels trǒwe·
Blům[WS 2] aller mege ein krantz
trost helfe gantz ein glantz·
der wunnen wunnen vbergulde
min sang sol wesen din·
dv wise min· sol sin·
uf din vnd dines kindes hulde·
mins hertzen gir· don vnd wort uf diner suͤszen milten hort·
nu lichte die mich lestent· swere schulde·
Es[WS 3] was ein selig vart·
wert vnd zart· div wart
durch vns getan·
der megde reine·
do er von himel kam·
der núwe adam· vnd nam·
das im was e vil vngemeine·
die menscheit· dur der menschen mein·
wie wol sich vuͤget da in ein·
der ceder groz· vnd ǒch der distel cleine·
Der[WS 4] kǒf den mort Judas
gab· kaifas der wc
der beste·
vnd ǒch da bi der groͤste
swie ring in Judas wag·
an im doch lag· ein slag·
uf in uf v́ns gůt rat ze troste·
ich lobe den hohen nidergang·
der in den twang· der helle sprang·
vnd v́ns von tievels banden· da erloste·
Swer[WS 5] mine schulde breit·
zen lúten treit· vnd secht
doch nicht von siner missetæte·
wie wol wie gar der sicht·
was mir geschicht vnd nicht
gedenket was er wilunt tæte·
der nimt das nieman gelten mag·
sin zunge slecht so swinden slag·
der wirs den tiefe blůtes vnde tæte·