Vns wil ein ſvmer komē

Vns wil ein ſvmer komē·
ſpꝛach ein magt ia han ich dē von rúwētal v̾nomē·
ſeht dē wil ich lobē·
min h̾ze ſpilt voꝛ froͤidē reht alſam eſ welle toben·
ia hoꝛt ich in reien mit dē kinden·
ia en wil ich niemer des erwīdē·
ich ſpꝛinge an ſiner hende zv̊ d̾ lindē·

IR mv̊ter rief ir nach·
weiſtv wie geſchach
diner geſpiln Iúten· des ſi bi ir eide mir v̾iach·
mit einem liede wůhs er ir vf das wempel·
ſi gewan ein kint bi im dc heiſſet lempel·
alſo lert er ſi dē gimpel gempel·

Mv̊ter la das ſin·
ia ſaſt er mir ein roſen tſchapel vf das hǒbet min·
das het liehtē ſchin·
zwen gemalt kalzen die bꝛaht er mir vber rin·
die trage ich noch húte an minem beine·
des er mich bat das weis ich alt̾ſeine·
ia volge ich úwer lere harte kleine·

Der mv̊ter der was leit·
dc dv́ tohter niht v̾nam dc ſi ir voꝛ ſeit·
do ſpꝛah dú ſtolze meit·
ich han ims gelopt des hat er min ſicherheit·
wc verlúſe ich da mit miner eren·
ia wil ich niemer wider keren·
er mv̊s mich ſinen trairoſ leren·