Vns tůt winter aber leide

Vns tůt winter aber leide·
vf der wunneklichen heide·
die hat er gemachet val·
manigú svͤsse vogel stimme·
twinget er mit siner grimme·
dc si swigent vberal·
dc klage ich vnd dannoch mere·
dú werlt ist verzaget so sere·
dc man niender vindet froͤiden schal·

Was klage ich tore ich tvmber·
ia verderbet mich ein kvmber·
dem ich niht entrinnen kan·
mich solde des wol genvͤgen·
ob sich kvnde dc gefuͤgen·
dc ich froͤideloser man·
mich da von verenden kvnde·
ob dv́ liebe mir des gvnde·
der ich lange her gedienet han·

ICh wil minem herzen mv̊ten·
dc es dvr die reinen gv̊ten·
noh ze froͤiden twinge sich·
von der minne ich bin betwungen·
ist mir da noh niht gelunge·
doch so froͤit gedinge mich·
vnd ir froͤide berndes lachen·
mag mich sorgen ane machen·
in gesach nie wib so minnenrich·

Was kan sorge bc vertriben·
danne lon von gv̊te wiben·
des kan ich erdenken niht·
ich weis wol dc hoh gemvͤte·
kvmt von reiner wibe gvͤte·
des dv́ meiste mange giht·
swer dc rehte welle bevinden·
der sol niht an stete erwinden·
seht dar vf habe ich mit froͤiden pfliht·