Vil svͤsse minne dv hast mich so betwungen

Vil svͤsse minne dv hast mich so betwungen·
dc ich mv̊s singen der vil minneklichen·
nah der min herze ie hat da her gerungen·
dv́ kan vil svͤsse dvr min ǒgen slichen·
al in min herze lieplich vnz ze gervnde·
wand ane got nieman erdenken kvnde·
so lieplich lachen von so rôtem mvnde·

Wa gesach ie man ein wib·
so schoͤne vnd gůte·
in allen welschen vnd in tútschen richen·
an kv́sche ein engel si ist in reiner hv̊te·
in alder werlte kan ich ir niht gelichen·
in weis niht wa ich ein lieber frowen fvnde·
wand ane got nieman erdenken kvnde·
so lieplich lachen von so rôtem mvnde·^{[WS 1]}

Do ich erst an sach die reinen minneklichen·
ich wande dc ein schoͤner engel were·
ich dahte ich solte an allen froͤiden richen·
do bant si mich in manige sende swere·
in truwete niht dc si mich also bvnde·
wand ane got·^{[WS 2]}

Anmerkungen (Wikisource)

1. Vorlage: wand ane got·.
2. Vorlage: wande ane got·