Hic sunt deliciae VENERIS quoque ADONIDIS horti: Artis amatori dura puella datur. Iacobus Palma Inentor.
Hinc dolor, hinc furor, hinc lacrumae & suspiria quando Meta doloris erit, Meta furoris erit. D. M. C. Ioan Ienet scalpsit.
O zarte Jungfraw Tugentreich /
Singet / frolockt vnd frewet euch.
Bald werdet jhr bringen darvon
In Ehren gar ein Jüngling schon.
Auch zarter Jüngling hoch geziert /
Seyd frölich / lustig triumphirt.
Auß Himmels Lauff hab ich vernommen /
Daß jhr gar bald werdet bekommen.
Ein zarte Jungfraw Tugentreich /
Die man wird verheurathen euch.
Dardurch werd jhr euch frewen sehr /
Weil sie begabt mit Zucht vnd Ehr.
Juno / die war kaum halb so reich /
Minerve Weißheit ist sie gleich.
Die zarte Venus also sah /
(Wie Adonis wohnet alda.)
Die Charitas so hochgeborn /
Habn sie zur Wohnung außerkorn.
Sie ist ein Würtzgart hüpsch vnd schon /
Darin viel edler Blümlein stohn.
Als Augentrost vnd Engelsüß /
Auch Wolgemuth / Mein nicht vergiß.
Hier steht Ehrenpreiß / solchs beschawt /
Da ist viel Tausentgüldenkraut.
Weil man nach schönen Blümlein tracht /
Je lenger / je lieber / Tag vnd Nacht.
Der Jüngling wird kein Ruh nich han /
Biß jhm der Gart gestanden an.
Welchen er pflantze vnd behalt /
Daß er jhm gebe warm vnd kalt.
In lieb vnd frewd tret beyd herfür /
Schliest auff deß schönen Garten thür.
In dem Garten euch wol lustirt /
Vnd mit einander hrumb spatzirt.
Er zeigt euch frölich allezeit /
Vnd sucht darinnen tausent frewd.
Gott woll euch segnen mannigfalt /
Daß jhr lang ob dem Garten halt.
Auff daß jhr viel Jahr möget grunen /
Vnd bringen manche edle Blumen.
Biß jhr vom trüben Erdenkreiß /
Wandert ins lustig Paradeiß.
Das wünsch ich euch zu dieser Stundt /
Mit gantzem Gmüt / auch Hertz vnd Mund.
Zum Beschluß.
Von dem Kräutlein je lenger /
je lieber.
JE lenger / je lieber / seyn wir allein /
Dann Trew vnd Glaub ist worden klein.
Man darff jetzt schier kein Wörtlein sagn /
Von stundt an ist es außgetragn.
Auff daß es ja nicht schwinden thu /
Gibt man demselben weidlich zu.
Der Venus vnd Adonis ebn /
Hab ich diß zum Beschluß gegebn.
Jungen Leuten sey diß gemacht /
Zu Ehren / vnd zu guter Nacht.
