Us hoher auentúre ein suͤsse werdekeit

Us hoher auentúre ein suͤsse werdekeit·
hat minne an mir ze lielichte betaht·
ich súfte vs herzeliebe swenne ich denke dar
do si mir gab ze minneklicher arbeit·
als ich in wu͗nsche hete gedaht
so zart ein wib des ich mich iemer ruͤmen tar·
vnd doch also dc es ir niht zevare ste·
si gab in grosser liebe mir ein riches we·
dc mv̊s ich tragen iemer me
in růche wem es ze herzen gê·

Mich bat min mv̊t dc ich der lieben kúnde nam·
so wol vnd wol mich iemer me·
min vollú ger min ǒgenweide vnd al min heil·
do si mir durch dú ǒgen in das herze kam·
do mv̊ste ich werben bas danne· ê·
gegen der vil klaren losen alzelange ein teil·
herze vnd sinne gab ich ir zedienste hin·
al minr froͤiden vrspring vnde ein an begin·
si gab mir des ich iemer bin|
fro vnd ist doch min vngewin·

Recht alsam ein rose dú sich vs ir klosen lat·
wenne si des suͤssen tǒwes gert·
sus bot si mir zuker suͤssen roten mvnt·
swas ie kein man zer werlte wunne enphangen hat·
dc ist ein niht ich was gewert·
so helfeberndes trostes ach der lieben stvnt·
kein mv̊t es niemer me durh denket noh vol saget·
was lebender selde mir was an ir gunst betaget·
mit leide liebe wart geiagt·
dc leit was vro dú liebe klagt·

Dv́ minne darf mich strafen růmes zwar sin darf·
swie gar ich vmbe vangen hat
ir klaren zarten svͤssen losen lieben lip·
nie stvnt min wille wider ir ku͗sche sich entwarf
wan das sich in min herze tet
mit ganzer liebe das vil minnekliche wib·
min wille was dien ǒgen vnd dem herzen leit·
dem libe zorn das ich so truten wehsel meit·
du͗ ganze liebe dc besneit·
vnd ǒch ir kúschú werdekeit·

Nv habe er dank der siner frowen also pflegen
als ich der reinen senften fruht·
ich brach der rosen niht vnd hat ir doh gewalt·
si pflag mis herzen ie vnd pfliget noh alle wege·
ey wenne ich bilde mir ir zuht
so wirt mv̊t an froͤiden also manigvalt·
dc ich vor lieber liebe niht gesprechen mag·
al mines trostes wunsch vnd miner selden tag·
nie man so werde me gelag·
als ich do min dv́ liebe pflag·