Uns kvmt ein wūneklichú zit

UNs kvmt ein wūneklichú zit·
des froͤit ſich alles dc dir iſt·
dú manigē hohgemvͤte git·
ſo wol dir meie dc dv biſt·
ſo rehte wūnekliche komē·
dc iſt mines h̾zen ſpil·
wir han dc alle wol v̾nomē·
wie d̾ fúrſte leben wil·
In oͤſterriche vn̄ and̾ſwa·
wil er behaldē ie den pꝛis·
Beide hie doꝛt vn̄ da·
iſt er an allē dingē wis·
Er hat ſin ding vollebꝛaht alſo·
dc mā dē w̾den dankē mv̊s·
Er mag wol iem̾ weſen fro·
ſwem er da bútet ſinē grůs·
Mit erē richet er der helt·
vō iar zeiare bc vn̄ bas·
In weis ob irs gelǒben welt·
er lat es niht durh ſmehē has·
Nach ſiner wirde in niemā gar geloben kan·
Swc er getůt wer getar ſich des genemē an·
d̾ habe ich noch bi minē tagē niht vil geſehē·
des hoͤꝛt mā ime die wiſē vn̄ die beſtē iehē·
Si ſlafent noch erweket ſi des dunket mih·
es wc ein ſpil gar vnz an her nv huͤtē ſich·
dc ſi dē helt erzúrnē niht·
dc iſt mī rat es mag geſchadē·
In weis ob ſis gelǒbent iht·
ſi ſint mit im gar vberladē·
vn̄ mv̊ſſē alle wichē voꝛ·
ſwa er vert hin mit ſiner ſchar·
er ſweibet ob in hoh emboꝛ·
vil ſchone alſam ein adelar·
Sinē rate bin ich holt er lêret niht wā werdekeit·
ſin wid̾ratēt niht ſin ere· die ſint vollekliche bꝛeit·
er hat vn̄ mag vn̄ getar getv̊n d̾ ſtolze waleiſ vnv́zaget·
w̾ lebt vō dē man nv ſo vil d̾ wūderlichē dinge ſaget·
er hat niht wādels vmb ein har·
ſwas er geredet dc lat er war·
Mit im ſo varnt ivden| criſtē| kriechē| valwē heidē vil·
vnger púlan| rúſſen| behein ſw̾ eht ſchone lebē wil·
Der iſt behalden ſwānē er vert bi im iſt er ein fromer mā·
Manigē armē er beratet ich hebe an mir ſelbē an·
da bi ſchaffet er dē beſtē vꝛide vb̾ ellú ſinú lant·
gv̊ten kǒf vmbe alles dīg er wendet rǒb vn̄ bꝛant·
Sin h̾ze blv̊t alſā ein bǒn·
d̾ zallē zitē froͤide birt·
Ir all̾ milte iſt gar ein trǒn·
wid̾ im er iſt d̾ erē wirt·
Min gelǒbe iſt dc ſw̾ in zer wochē eines mag geſehē·
dc dē vngelúkes niht enkeiner ſlahte mag geſchehē·
er mag wol heiſſen friderich·
es wirt ab̾ niem̾ ſin gelich·
In kurzen zitē dc geſchiht·
dc mā wol eine krone·
ſchone vf ſinē hǒbte ſiht·
ſo vert der fúrſte ſchone·
er iſt vnſer wūne·
glanz alſam dú ſvnne·
ſo iſt ſin tvgēthafter lib
milt vn̄ erebere·
ellú wol getanē wib·
fragent vō im mere·
vō dē gutē·
wol gemv̊tē·
vꝛagent ſi vil dike bi dē rine·
Allenthalbē·
vf dien albē·
lopt mā in wol vn̄ die ſine·
Vf dem waſſer vn̄ dē plane iſt er ſo v̾meſſen·
in weis niht des an dē degē iend̾ ſi v̾geſſen·
Trurig h̾ze fro·
wirt vō im ſwāne er ſinget dien frowē dē reigen·
So hilfe ich im ſo·
dc ich ſinge mit im zaller zit gerne dē meien·
Sin ſchimpf d̾ iſt gůt·
wan er git·
zaller zit·
mit eren d̾ reine·
Da bi hoh gemv̊t·
offēbar-
lich getar·
ſin gůt dc iſt gemeine·
er iſt zallē zitē fro·
im zimt wol dc lachē·
dc kan er vil ſv̊ſſe alſo
wol mit froͤiden machē·
Veſt alſam ein adamant·
ſwa mans ſol beh̾ten·
Sin lop vert dur ellú lant·
dc kan niemā ſchertē·
Lobe in iemā bc dāne ich·
der ſol des genieſſen·
Alle ſinger dvnket mich·
mvͤſte ſin v̾dꝛieſſen·
Nv dar·
dú ſchar·
wirt ab̾ michel· kom̄ wir zeſamne ī der gaſſe vō dien ſtraſſē·
Nv dan·
ich kan·
noch wūder machē· des ich niht wil laſſen·
Mit mir·
ſvlt ir·
komē vf den anger· da mā die ivngē mit ſcharē ſiht zů ſigē·
Da ſint·
dú kint·
voꝛ dien mā mv̊s beide floͤttē vn̄ gigen·
wa iſt nv dú gůte·
mit ir pfawen hůte·
der v̾giſſe ich niem̾·
ſolde ich lebē iem̾·
bi d̾ lindē·
ſol mā vindē·
vns bi ſchonē kindē·
da ſvln wir ſingē·
vn̄ ſpꝛingē·
da ſol vnſ gelingē·
la wa· lat ſi ſich vinden·
ſa· da· bi den ſchonē kindē·
da ſol niemā ſin vnfro·
da d̾ tanhuſere·
Reiget mit d̾ liebē ſo·
dc w̾e im ein ſw̾e·
w̾e da niht fro kúnigvnt·
mit ir reidē loͤken·
dú treit einē rotē mv̄t·
dc ſint ſvm̾toͤken·
da wirt mazzee
mir ze dꝛazze·
lǒfet ſi mir voꝛ mit dē balle·
Gvͤtel gvͤtel·
mache ein mvͤtel·
dc es mir vn̄ dir wol gevalle·
vf vf kint pꝛuͤuet dc lebē·
ſit vns got dē lib hat gegebē·
So ſvln wir ſingē·
froͤliche ſpꝛingē·