Uar hin verwassen winter lank
[426r]
Uar hin verwassen winter lank·
din getwang wirt noh krank·
ioh mv̊st dv verswinden·
der svmer wil berg vnd tal·
vberal· ane zal·
gar von not enbinden·
kalt is siht man zerfliezen·
dc kvmt von der svnnen glanz·
man siht noh húre hofschen tanz·
manigen swanz· vnd kranz
wen sol der verdriessen·
wib dv́ sint dar vnder besvnder·
ganzer froͤide ein anevanc
vnd aller wunne ein wunder·
Habt vrlub rifen vnd sne·
iarlang me· dur den kle·
siht ma blv̊me dringen·
des svlt ir wesen an froͤiden balt·
ivng vnd alt· manigvalt·
hoͤrt man vogel singen·
walt anger heide vnd ǒwe·
lihter meie hat bekleit·
nv wol vf zv̊ der linden breit·
svnder leit· swer gemeit·
schonheit welle schowen·
wib dú sint dar vnder besvnder·
ganzer froͤide ein anevanc
vnd aller wunne ein wunder·[WS 1]
IR ivngen leigen wol gemv̊t·
wesent frůt· gegen der blv̊t·
schon stet dc gevilde·
ir svnt verdienen eren zol·
tv̊nt so wol sam man sol·
erent wibes bilde·
wib sint der tvgende ein krone·
gv̊ter dinge ein vber dach·
von in wirt úwer vngemach·
svnder ach· krank vnd swach·
dc wirt ú zelone·
wib dú sint dar vnder besvnder·
ganzer froͤide ein anevanc
vnd aller wunne ein wunder·[WS 2]