Teutscher Nation Herligkeitt: Santen
[318] Santen (welches etliche Xanten schreiben) auch ein schone Statt auff der lincken seiten des Rheins / welche ihrer altheit vnd Antiquitet noch teglich viel warzeichen [1] gibt: vnd sonderlich bezeugt solches der Stein / zu Latein tophus genant / bey den Einwonern Duuenstein (welches auch scheinet gebrochen zu sein aus Tophenstein[2]) vnnd wirdt dessen ein grosse menge alda gefunden, dan die Ackerleuth im bawen diese Steine heuffig versamlen vnd bewaren / sie alsdan den Brabenderen vmb ein gros gelt verkauffen / welche fort köstliche [3] maurstein daraus bereiten / vnd man helts dafur / das derselbigen art auch keine anderswa mehr gefunden werden / vnd wirdt von ihnen Darast[4] genant: dan hie mit werden auch die wassergraben vnnd canalen oder roer / bißweilen auch gantze gewelb vnder der Erden bewaret vnnd dicht gemacht / das das wasser keinen durchdrang an ihnen haben möge. vnd wirdt hiemit bestrichen vnd befestiget alles was man mit gewisser dichtigkeit vnd festigkeit wil bewaret haben: dan der gyps oder Kalck dieser Steine / allen anderen [5] maurungen vnd schmirungen weit vorgehet. der stein ist etwas aschenferbig / lochericht / vnd sehr hart: vnd man helts dafur / das die Römer hin vnd wider vff diesem ort etliche starcke Heuser vnnd Vestungen von diesen furernanten steinen gebawet haben / dieweil kundig / das der stein an diesem ort nit waxe / sonder anderstwaher hiehin gefuert sej worden. Man hat aber diese steine auch kurtzlich bey Neumagen in der Erden gefunden / alda man etliche derselben stucker außgegraben / welche in ihrer vierecketen lenge funff füß begriffen. dieweil aber dieser stein löchericht ist gleich ein schwam oder reibstein so man in etlichen batstuben siehet / welche auch vff etlichen orten die Schlächter gebrauchen / die Sew[6] auswendig damit zu schaben: so kan man nit leichtlich einige Buchstaben oder andere zeichen darin hawen. Man hat aber nahe dabey gebackene stein gefunden / in welchen mit Römischen littern etliche monumenten eingehawen waren / vnnd werden dieselbe allein in einer rechten linien vnden an einem Berg bey dem Flus / die Meer genant / ausgegraben. daher man vermuthen kan / es mussen entweder einige Vestungen oder andere gebew von denselben steinen alda gestanden haben. Ja auch das Schlos zu Neumagen welches durch altheit verfallen / vom Carolo Quinto wider erbawet worden / war von eitel solchen steinen auffgefuhrt.
