Swie der walt in gruͤner varwe ste
[161r]
Swie der walt in gruͤner varwe ste·
vnd dú vogellin hohen ir sang·
doch tv̊t mir min alter kvmber we·
der mich húre vor dem meien twang·
sus ist froͤide mir benomen·
owe wenne sol mir trost von liebem wibe komen·
Wie mag mir ein swib so lieb gesin·
der ich alse gar vnmere bin·
dc kvmt alles von der stete min·
doch so ratet mir mines herzen sin·
dc ich an ir stête si·
besser ist rin stetú liebe danne vnstêter dri·
Manigen ist mit sint vnstête bc·
danne mir mit sinr stete si·
dc sol ich wol lâzen ane has·
wan der selbe ist herzeliebe vri·
swer nie leit durh herzelieb gewan·
der weis ǒch niht wie herzeliebe lonen kan·
Mir ist dike herzeklichen wol·
vnd ist mir dike herzeclichen we·
swenne ich von der lieben scheiden sol·
so han ich dekeine froͤide me·
wan swenne ich si aber mag gesehen·
sone kvnde mir an froͤiden niemer bc geschehen·
Ist dú liebe nah ir schoͤne gv̊t·
so mag miner swere werden rat·
nv wc danne ob si vngenade tůt·
ich weis wol dc si beide hat·
wie moͤhte si ane gvͤte sin·
als grôsse schoͤne als si hat dú vrowe min·