Swer wenet dc ich durh gebende (Mit aufgelösten Abbreviaturen)

Swer wenet dc ich durh gebende·
lâsse mines herzen trost·
ich wolde ê dc es were min ende·
vnd ich niemer wurde erlôst·
mir ensi der mv̊t·
gegen ir so gůt·
dc er niht wenket von ir swas mir ieman tůt·

Mich wil der zwiuel vberwinden·
ich enlâsse in er enmag·
lat si mich genade vinden·
dú mir ie zeherzen lag·
sin lât des niht·
so si gesiht·
die stete an mir si fuͤge dc mir lieb geschiht·

Nieman sol mir dc verkeren·
dc ich bin an si verdaht·
si mac mir min froͤide mere·
dú mich hat in truren braht·
der gruͤne kle
ist mir ein snê·
swie wol dú kleinen vogellin singent mir ist doch we·