Svmer zieret· heide vnd anger vnd den walt
[303v]
Svmer zieret· heide vnd anger vnd den walt·
da manig herze balt· den lib kunrieret[WS 1]·
wan mag schowen wohl bekleidet berg vnd tal·
da hoͤrt man die nahtegal vnd in den ǒwen·
hie von froͤit sich al dú werlt gemeine·
da bi kleine· ist min froͤide zaller zit·
sit dc mir niht froͤide git· dú svͤsse [304r] reine·
Si ist vor valsche wol behůt·
div mich singen tůt·
Der ich singe· vnd vil gedienet han·
div wil sich des niht entstan· war nach ich ringe·
nach ir hulden ringe ich alle mine tage·
also dc ich sorge trage· die mv̊s ich dulden·
bis dc ich noch lieben trost gewinne·
von der minne· sost min sorge gar ein trǒm·
svs trage ich den iamers sǒm· in minen sinnen·
Si ist vor valsche wol behůt·
div mich singen tůt·[WS 2]
Zeinem male schos ir minneklicher schin·
in das sende herze min· ir minne strale·
die ich tvmber iemer mere bi mir trůg·
also dc ichs nie gewůg· den grossen kvmber
trage ich vnd ǒch ander klagende swere·
bis ein mere· mir von der vil lieben kvmt·
dc si mih ze froͤiden vrumt· dú seldenbere·
Si ist vor valsche wol behůt·
div mich singen tůt·[WS 3]
Lieblich lachen· liehten ǒgen roter mvnt·
schafent hvndertvsentstunt· min herze erkrachen·
gůt gebaren· da bi wol gestalten lib·
hat dc minnekliche wib· dú min kan varen·
si ist der wunsch vf erde sicherliche·
froͤidenriche· ist si doch mit rehter zuht·
in weis niender wibes fruht· dú ir geliche·
Si ist vor valsche wol behůt·
div mich singen tůt·[WS 4]
Do ir ǒgen· santen mir ir losen blik·
sa zehant d minne ir strik· warf an mich tǒgen·
guͤtlich gruͤssen· wart mir an der selben stvnt·
sit wc ie min herze wunt· von der vil svͤssen·
si hat mir den strik noh niht enbunden·
vnd die wunden· vngeheilet· we mir we·
da von sorge ich wies erge· zemanigen stvnden·
Si ist vor valsche wol behůt·
div mich singen tůt·[WS 5]