Svmer diner kvnft froͤit sich dú heide

Svmer diner kvnft froͤit sich dú heide·
svnderbar·
swer den winter trurig wc vnd ǒch ich·
gegen der wunneklichen ǒgenweide·
nemt sin war·
der walt hat von lǒbe ein dach vber sich·
da dv́ kleinen vogelin vnder sv̊ze singent·
dú vil manigen herzen froͤide bringent·
herze min wes troͤst dú dich·
sit dú gv̊te ist froͤidenrich·
also sprich·

Swie der meie verwet sine bluͤmel·
rosen rot·
viol liljen purper var gel brvn bla·
noch bas gevallet mir min minne mvͤmel·
es enbot
mir sin nein do ich im seite vmbe ein ia·
alsvs hilfet mich gegen ir min langes kriegen·
si giht dc die man wol kvnnen triegen·
frage ich frowe sprechent wa·
si giht hie dort vnd da·
minne la·

Sol vnminne frúndes minne heissen·
minne sprich·
wie zimt diner frowen dc vnd ǒch dir·
wan sol gv̊ten frúnt niht lange reissen·
wil si mich·
dc ende in der zit ich mv́ge vnd gir·
ia fúrhte ich der blvͤte· swanne es sere rifet·
wc ob si ein andern mv̊t ergrifet·
des ich an ir gerne enbir·
svs bin ich ir dienest zwir·
wirt si mir·