Stammbuch berümpter Fürsten, Graffen vnnd Herren Geschlechter:Seite 1

<<<Vorherige Seite Stammbuch Oder Erzölung aller namhaffter vnd inn Teütschen Historien berümpter Fürsten, Graffen, vnnd Herren Geschlechter Nächste Seite>>>
Hoppenrod Stammbuch 001.jpg
fertig
Fertig! Dieser Text wurde zweimal anhand der Quelle Korrektur gelesen. Die Schreibweise folgt dem Originaltext.


Catalogus / vnnd verzeichnus der fürnembsten Graff vnd Herrschafften / so inn gantz Sachsenlandt vor zeitten gewesen / vnnd zuom theil noch vorhanden seind.


Aldenhausen eine Graffschafft / ist gelegen vnder Magdeburg inn der Marck / es hat darzuo gehoeret die Osterburg.

Herr Wernher Graff zuo Osterburg / des Ehelich gemahel gewesen Fraw Helida Marckgraff Otten zuo Soltwedel / des grossen Graffen zuo Ascanien Tochter.

Anno 1210 hat gelebt Graff Seyffert von Aldenhausen / dem hat Marckgraff Albrecht zuo Brandenburg das Staetlin vnnd Schloß Osterburg abgewonnen / vnd widerumb zuor Marck gebracht. Brottauff lib. 2. Cap. 8. in Genealogia Anhaldiorum.

Anno 1352 hat das Stifft Magdeburg dise Herrschafft jnnen gehabt / denn da zwischen den Thumherrn vnd Burgern ein grosser vnwill entstunde / von wegen etlicher Bürgschafft / damit die Thumherrn für Bischoff Otten verhafft waren / der den Burgern groß gelt abgeborget / vnd die Thumherrn die Burger nicht bezalen wolten / kam es zuo einem kriege. Also das die Thumherrn sampt jren genossen auff die Burger raubeten / jhnen das vieh namen / wurden die Burger auch verursachet sich zur gegenwehr zuo stellen / vnd zogen auch auß mit wehrhafftiger hand / nahmen dem Stifft vil Heüser ein / da wurden vnder anderen auch Aldenhausen von den Burgern eingenommen / vnd gar außgebrandt. Chro. Magd. & Saxo.

Anno 1371 hat der 31 Ertzbischoff zuo Magdeburg Albertus vom Sternberge / dise Herrschafft vom Stiffte verkaufft / wie andere heüser vnd Herrschafften mehr / dann er vbel hat hauß gehalten. Chro. Sax.

Anno 1383 hat Albertus von Querfurt Ertzbischoff zuo Magdeburg dise Herrschafft wider ans Stifft bracht. Chro. Saxo.

Alsleben ein Schloß vnnd Staetlin dabey / ligt an der Salah