Sta bi la mich den wint an weien

Sta bi la mich den wint an weien·
der kvmmt von mines herzen kúniginne·
wie moͤht ein luft so sv̊ze draien·
ern wer al vht vnd vht vil gar ein minne·
do min herze wart verdriben·
dc wart von ir enthalden·
doch wūschte ich des got mvͤz ir eren walden·
ir mv́ndel dc ist rosen var·
sold ich si kússen zeinen male·
so mvͤze ich niht alden·

Ich sach die schonsten in den landen·
da man aller frowen mv̊z geswigen·
ir ǒgen klar ir wîssen handen
swa si wonet dar mv̊s ich iemer nigen·
mvͤst ich bi der wolgetanen·
liebú kint pronieren·
vnd ein ganze naht bi ir dormieren·
ahý ia wer des alzevil·
mich genv̊gte solde ich in ir dienste
den minen sang schantieren·