Sol von minnenklichem wibe

Sol von minnenklichem wibe·
mir vil senden man niht swere werden bůs·
von ir truͤtelehten libe·
wart mir nie wan dc ich nah ir suͤften mv̊s·
von der ich den schaden han·
pfligt gegen mir niht steter trúwen
des wil ich an ir lachen mich niht mere lan·

Mir were doch das leben swere·
troste mich ein anders liebes troͤsten niht·
wan ich weis dú inren mere·
dc die liben nieman wan in eren siht·
vro mich doch ein troͤsten tůt·
lide ich not an meinem libe
mit gedulde· dast mir an der sele gůt·

Was sol ich ir mere kúnden·
wan das si an den trúwen mich verderben lat·
si wil sich an mir versúnden·
wissent dc es iemer vf ir sele stat·
alles wandels ist si vri·
swie si mich an froͤiden irre·
got si mir als ich der herzelieben si·

 IR vil froͤlich stenden ǒgen·
dú hant so verseret mich vil senden man·
dc wil nieman mir gelǒben·
da ist ǒch der vngetrúwe schuldig an·
dc ist ir rosevarwer mvnt·
den si vf minen schaden spiset·
der hat an dien gantzen trúwen mich verwunt·