Sol mir iemer sin ein wib vor allen wiben

Sol mir iemer sin ein wib vor allen wiben·
vnd ich ir doch niht vor einem man·
wer sol danne sende swere mir vertriben·
ob ich des erwerben niene kan·
vnd ich doch von ir der gůten niht enscheide·
weder herze noch den sin·
liebet si mir da von das ich ir so leide·
so weis ich dc ich ir tore bin·

Ich mv̊s dur die v́blen valsche merekere·
miner besten ǒgenweide enbern·
herre got dv vuͤge in laster vnd swere·
durh din ere solt dv mich gewern·
das si min vergessen mit ir selber leide·
vnd der lieben frowen min·
dc si got von selden vnd von eren scheide·
die vnrehter hv̊te vlizig sin·

Herre got durh diner lieben mv̊ter ere·
leide si mir alder liebe ir mich·
in gelas so herzeliebes nie niht mere·
da von bin ich maniger sorgen rich·
were si mir in der maze als ich ir were·
so moͤht es wol werden rat·
es enhat nieman so herzekliche swere·
so der herzeleit bi liebe han·