So wol der lieben svmerwunne
[306v]
So wol der lieben svmerwunne
wc· si der werlte froͤide git·
swie lútzel si mih froͤwen kvnne·
ie doh so lâsse ich ane nît·
ob al dú welt mit vroͤiden lebet·
vnd dú nahtegal in hohem mv̊te singet·
swie gar ir mv̊t in froͤiden swebet·
ist dc mir dv́ wolgetane froͤide bringet·
an der so gar min froͤide stat·
so ist doch min froͤide ir froͤiden vngelich·
wan swenne ir froͤide ein ende hat
so bin ich wil dú gůte froͤidenrich·
Si lat mir in den senden rúwen·
ane allen trost ze langen vrist·
swie ich si meine doh mit trúwen·
vil gar ane allen valschen list·
si wenet lihte dc[WS 1] mir·
niht en wone stetekliche in minem mv̊te·
dc ich si so lange verbir·
dc en meinet niht wan valscher lúte hůte·
si sol dc wissen swa ich bin·
dc ich ir niht vergessen kan·
si ist mines herzen kúnigin·
vnd ich ir lobes steter dienest man·
Si wunder reine wol gemv̊te·
kan aller dinge mâsse han·
des sol si minnekliche gůte·
ǒch eine mâsse an mir began·
vnd gebe mir eteslichen trost·
dc ich von senden sorgen werde enbunden·
als ich denne wirde erlost·
so vroͤwe ich mich·
ir trôstes zallen stunden·
sin[WS 2] troͤste al eine so bin ich·
an vroͤiden tot swie vil vns blv̊men kvmet·
owe wan troͤstet si nv mih·
sit ir trost mir so wol ze vroͤiden frvmt·