So dú nahtegal beginnet singen

So dú nahtegal beginnet singen·
in den ǒwen vberal·
vnd man siht die blv̊men schoͤne entspringen·
da die vogel habent ir schal·
in dem walde widerstrit·
bin ich vro dc tv̊n ich vf gedingen·
gegen des meien hohgezit·

Sol an steter liebe misselingen·
iemen dc geschiht ǒch mir·
in kvnde min herze niene bringen·
noh dekeine zit von ir·
durh si lide ich sende not·
nah ir minnen mv̊s ich iemer ringen·
mir beneme si der tot·

Ein gůt gedinge hat mih her enthalden·
dc ich niht verdorben bin·
min sorgen mv̊s ich einer walden·
dc benimt mir gar der sin·
des mir tete ein wib wol rat·
an der ich min stete han behalden·
doch swie kleine es mich veruat·

Minne bist dv so man seit gewaltig gv̊ter wibe·
so hilf mir enzit mich twinget not·
bit die gůten dc si minen kvmber noh vertribe·
anders dv bist schuldig ligge ich tot·
so bitte ich die gůten selbe so ich beste kan·
in weis wie wan dc nie wib wart lieber einem man·

Minen frúnden wil ich kv́nden dc mich hat betwungen·
ein wib dú mir lieber ist danne ich·
manigen tag so han ich nach ir hulden her gerungen·
vnd dc doh leider kleine hilfet mich·
wie bin ich gesinne· dc ich von ir niht enkan·
minen mv̊t gescheiden· we wc spriche ich tvmber man·

Hat si mine stete noh zevollen niht versv̊chet·
als ein steter frúnt den andern tůt·
so erlǒbe ich ir vber mich also ob sis gerůchet·
roͤsten mich rehte in der minne glůt·
swas wandels an mir si der werde luter gar·
so dc geschiht so nement min bc ze frúnde lieber war·