Sit der winter· hinter ist verdrungen

Sit der winter· hinter ist verdrungen·
so wirt wunnenklich besungen·
wald heid· anger bluͤnde ǒwe· vberal·
gen dem morgen· sorgen· land ir jungen·
sit vrilichen stet entsprungen·
viol lilien Rosen blůmen alle wal·
singent vogellin· so sing ich der suͤszen·
miner vrǒwen· schǒwen· vnd ir gruͤszen·
mag mir sendú leit vnd truren buͤszen·

Werdú minne· sinne· han ich kleine·
bit die wol getanen reine·
das si entzit bedenke mine sende not·
sit min ǒgen· tǒgen· si alleine·
minnet her von kindes beine·
das in steter liebi mir ze hertzen gat·
wan ir lachen kan mir truren swenden·
der vil klaren· varen· mag mich pfenden·
ǒch mag si mir sende sorge wenden·

IN den sinnen brinnen· ich von grunde·
dc ich gegen munde·
nie getorste klagen minen senden pin·
wolt sis merken· sterken· si mich kunde·
wunschent nach den funde·
mir ze troste· hohgelǒbte^{[WS 1]} vrǒwen fin·
wan ich minne můten daz^{[WS 2]} ze knehte
si mich neme· kem ich ir vnrechte·
das mir vrlob gebe dú Roͤselechte·

Anmerkungen (Wikisource)

1. Vorlage: hohgelǒbten.
2. Vorlage: dān.