Sit dc ich min selbes leit mv̊s minnen
[167r]
Sit dc ich min selbes leit mv̊s minnen·
welt ir wissen was mich des betwungen hat·
ir vil losen blike mit reinen sinnen·
vnd ir mvnt der ouch so gar zewunsche stat·
ich han mengen mvnt vernomen·
der wol lachen vnd sprechen kvnde
dirre mvnt ist aller dinge vollekomen·
Es ist ein wunder swc si mir getête·
dc ich ir doh niemer kvnnde sin gehas·
ich bin ir so gv̊tes willen stête·
dc ich ir in minem mv̊te nie vergas·
we wes habe ich nv veriehen·
ia vergas ich ir vnd ǒch min selbes
do min ǒge ir losen ǒgen solten sehen·
Mir ist min lieb ein herzeklichú swere·
so ist da bi das leit min hohste froͤide gar·
e das ich dc[WS 1] liebe leit verbere·
von dem ich vil dike in hohem mv̊te var·
e wolt ich es iemer tragen·
lide ich leit von rehter herzeliebe·
des sol ich noch niemer selig man verzagen·
Si sol mich des einen lan geniessen·
das ich ane si niht ganzer froͤide han·
vnd dc mich des niemer wil verdriessen·
ich welle ir mit trúwen iemer bi gestan·
wol ir herzen dc es lebt·
so gar nach reines wibes gvͤte·
wol ouch dem minen dc es nach ir hulden strebt·
Anmerkungen (Wikisource)
- ↑ Vorlage: ich das ich dc.