Singent vogel singent miner frowen der ich sanc

Singent vogel singent miner frowen der ich sanc·
ich sanc vmbe alle ir ere vnd vmbe ir werden frúndes lip·
den beiden dien ich gerne ir so dient ich ane danc·
das trvwe ich wol erwenden sit sich das wnder schone wip·
eines riters vnd ir eren hat bewegen·
ich pflag ir her nv mv̊sse ir got der riche pflegen·
vnd helf ime wol von hinnen er hat ze lange hie gelegen·

Ich zúge es vf der cleinen vogelline morgen sanc·
das ich dir han geleistet riter swas ich leisten sol·
dime libe vnd miner frowen her des mich min trúwe ie twanc·
dast húte vnd iemer mere bist bewacht vnd behuͤtet wol·
wan das ir zorn gegen tage mir zwiuel git·
nv weke in frowe ich sige im rehte scheidens zit·
nv huͤte din selbes riter gros angest bi der liebe lit·

Ich bin vnsanfte erweket frowe ob ich entslafen was·
von manigem vogel sange die sich da froͤwent gegen dem tage·
ich horte lute singen den wahter vf dem palas·
als er vns hat bescheiden mit sange horte ich sine clage·
wie hastv selic wib mich das verdaget·
das dv niht spreche riter wache ich wên es taget·
nv mv̊s ich von dir scheiden gros angest mich von liebe iaget·