Si prisent alle svnder strit

Si prisent alle svnder strit·
den svmer mit den blůmen rot·
vnd hant des winters ane strit·
si iehent es habe gemachet tot·
vil vogelline in siner zit·
swc ir genas dc wc mit not·

Nv ist der winter alse kalt·
von vns gescheiden· sihe ich wol·
gerichet lǒbes ist der walt·
vil svͤsses sanges ist er vol·
mit blv̊men varwen manicvalt·
dú heide stet als si da sol·

Ist ieman der ân herzeleit·
lebt was der froͤiden siht·
sich hant dú zit so wol geleit·
dc al dú welt genaden giht·
min trǒme gote sin geseit·
ich wenne dest an mir enwiht·

Was singe ich tvmber von der zit·
dú mir so kleine froͤide git·
mir sint die blv̊men vnd der kle·
alsam der rife vnd ǒch der sne·
geliche liebe tv̊nt si mir·
sich minne das habe ich von dir·

were ich ein vngeduldig man·
so meniger der niht liden kan·
ich wert vor mengen iaren tot·
svs lide ich kvmberliche not·
mit zúhten vnd tv̊n dc so·
dc ich an dem ende werde werde vro·

Nv wil ich klagen minv́ leit·
not vnd al die swere· die ich han·
Mir wart von minnen vorgeseit·
wie si habe verderbet mengen man·
den si mit kreften vber lůt·
vnd dc ir weis got niemen tv̊t·
so rehte der mit selekeit·
von ir gescheide ân herzeleit·

der minne dienen ist ein not·
die man wunder kûme tragen mag·
dvrh si lidet meniger not·
der ir doch mit herze trúwe pflag·
sam tristan der mich rúwen mv̊s·
swie mir der rúwe niemer bv̊s·
werde sam tet pýramvs·
vnd ǒch der kúsche ýpolitus·

Was hvlfen alle die gezelt·
die noh ie der minne swert erslv̊g·
es was so maniger erwelter helt·
dc ich mv̊t vf minne nie getrůg·
vnd ich· mich tvmben des bewag·
ine wolde niemer ganzen tag·
minnen dienstes sin gereit·
nv stet es anders dest mir leit·

Ich swimme an ein ze weres zil·
vnd halde ein gar verlornes spil·
Fúr reht geschiht mir gros gewalt·
des ist min rúwe manicvalt·
ine bin so alt der iare niht·
so man mich gra des hares siht·

Mir ist der mv̊t verseret so·
dc man mich niemer rehte fro·
gebaren siht wan sam der tůt·
der niht erwern mag sin gůt·
ane flehen wan fuͤre ims hin·
der lachet hervs vnd grînet hin in·

Alse selcher smiere siht man vil·
von minem mvnde svnders herzen gir·
Ich tůn iv des ich niht enwil·
vnd swas ich herze froͤide enbir·
minne dc hast dv getan·
dvne woltest mich erlan·
ich enmvͤse haben wan·
da es niemer kan vervan·

Ich han verkvnnet trostes mich·
gedinges bin ich worden arn·
swer iemer mvge der troͤste sich·
ich mv̊s ze trůbenhusen varn·
da erkennent alle min gemach·
min beste rat ist we vnd ach·
welch brůder mort er an mir rach·
der mich in disen kvmber trach·

dc div minne dc si si·
von mir verwasin iemer me·
wan lie si mich ir dienstes vri·
als ich doch was gewesen ê·
minv́ iar an disiv zit·
es ist ein iemerlicher strit·
der niht anders trostes git·
wan danne an dem ende tot gelit·

Nv bit ich got dc er min not·
bedenke dc ich niht den tot·
genem dvr alse selche tat·
mir selben wil ich einen rat·
geben het ichs ê getan·
ich hete noh ze liebe wan·

Das ist sit ich bekv́mbert bin·
dc ich den lib vnd ǒch den sin·
twinge swer dc beste tv̊t·
vnd niht zevalsche stet sin mv̊t·
dc ich des neme gůte war·
vnd als er vert dc ich so var·

vnd tv̊n ich dc so weis ich wol·
dc mir gelinget swar ich wil·
warvmbe niht wand es so sol·
wol tv̊nder lúte ist niht ze vil·
wes engvlte ich armer dan·
wirde ich ein rehttv̊nder man·
ich sol von schuldn hvlde han·

Doch ist es leider so gewant·
dc menger mit vil gůter tat·
heiles lon noch nie bevant·
vnd iender gv̊t gelúke hat·
dem dv́ schande hulden giht·
owe dc dc iemen siht·
alde es so rehte vil geschiht·

Seldebernden heil verbirt·
dem ie sin trúwe zvht gebar·
mengem vngelonet wirt·
des lib noch ie was schanden bar·
dc zeget manigen gv̊ten mv̊t·
owe so geschiht dem gůt·
der niemer rehte wol getůt·

doch râte ich eime gv̊ten man·
er habe sich niht sere daran·
wir mvͤssen doch von schvlden iehen·
vnd han ǒch selbe wol gesehen·
swer sin ding reht ane vie·
dc es im dike wol ergie·

Wan vindet lihte der ein teil·
dien niemer wil gevolgen heil·
so hilfet si doch zaller stunt·
swanne sprichet al der werlte mvnt·
owe dc mit gv̊ter tat·
der man niht gelúkes hat·

Minne dir si vor geseit·
wie heil gelúke selde tůt·
La dir iemer wesen leit·
soldest es iender han behv̊t·
sit ane dich niemen si gemeit·
wesen mac so sol din mv̊t·
dien besten lones sin gereit·
vnd niht den andern alse gv̊t·

An dine genade wil ich mich·
ergeben vnd si alles hin·
swa dv ie gesvndost dich·
vergib mir minnen argen sin·
vnd ǒch dú wort· la den gerich·
ich weis wol dc ich schuldig bin·
swc dv gebútest dc wil ich·
leisten iemer vf gewin·

Von dir ensol ich noch enmac·
noch ǒch enwil dc ist eht war·
Ich han erstanden dc din slag·
tv̊t kindes hǒbt grawú har·
halden dc ich mich bewag·
ine wolde niemer minú iar·
dir gedienen gantzen tag·
dc rúwet mich ich bin es clar·

Daran gedenke des ist zit·
ein man sol lâssen sinen strit·
wider den dest ere getan·
der sine wer het gar verlan·
ein man ist tvsent manne her·
die alle wen sin âne wer·

Alsvs si ǒch min wer verlan·
ich wil zeinr anderre rede van·
ich mag ǒch der vergessen niht·
von der mir disú not geschiht·
dc ist dú liebe frowe min·
von der sol nv dú rede sin·