Si iehent ich habe doch vollen teil (Mit aufgelösten Abbreviaturen)

Si iehent ich habe doch vollen teil·
der welte volge vnd ǒch die kvnst·
war vmbe ich swige vnd nit ensinge als wilent e·
si redent ir zvcht got geb in heil·
vnd das es in gegen liebes gunst·
bas danne mir noch gelungen si ze leste erge·
in zwiuel nit vnd wústen si·
wie rechte krank dar an gewesen ist min gelinge
si stuͤnden mir des alle bi·
das es mir not tůt das ich swige vnd nit ensinge
sus wunder nieman ob ich sanges abe geste·

Als mir in die gedanken kumet·
was ich ir liebe schaden habe·
dur die min herze seneclichen kumber treit·
vnd mich das nie nit hat gefrumet·
wan das ich bin gewachsen abe
an froͤiden dv́ der welt ie was von mir bereit·
so wirde sinne vnd witze bar·
wie mocht ich danne gesingen vs so truͤbem můte·
min neme ir helfe besser war·
das mir doch etteswas von ir beschehe ze gůte·
so ist min froͤide vnd al min singen hin geleit·

Sid das ich nu nit bringen mag·
der welte froͤidenrichen sang·
des war so můs ǒch klage sanges sin geswigen·
ob ich des ie da her gepflag·
dar an so was min witze krank·
das můs nu hinnen vúr von mir gerůwet ligen·
was tǒg ze sange ein truͤbes klagen·
ein súfteberndes liet ein froͤidelos gedoͤne·
geschicht mir leit ich wils gedagen·
kumet lieb mit froͤidenrichem sange ich das bekroͤne·
von dirre zit so můs der sitte an mir gesigen·