Selb wahsen kint dv bist zekrumb

Selb wahsen kint dv bist zekrumb·
sit nieman dich gerihten mag·
dv bist dem besmen leider al zegros·
dem swerten al zekleine·
nv slaf vnd habe gemach·
ich han mich selben des zetvmb·
dc ich dich ie so hohe wag·
ich barg din vngefuͤge in frúndes schos·
din leit bant ich ze beine·
minen rugge ich nach dir brach·
nv si din schv̊le meisterlos an miner stat in kan dir niht·
kan es ein ander bas das ist mir liep swas liebes dir da von geschiht·
doch weis ich wol swa din gewalt ein ende hat·
da stet din kvnst nach sv́nden obe dach·

Dú minne lat sich nennen da·
dar si doch niemer komen wil·
si ist den tôren in dem mvnde zam·
vnd in dem herzen wilde·
nv huͤtet ir úch reinen wib·
vor kinden bergent úwer ia·
sone wirt es niht ein kindes spil·
minne vnd kúnheit sint ein ander gram·
vil dike in schoͤnem bilde·
siht man leider valschen lip·
ir svlt e spehen war vmbe wie wenne vnd wa rehten vnde weme·
ir úwer minnekliches ia so teilet mitte dc es gezeme·
sich minne sich swer also spehe der si din kint so man so wib die andern dv vertrib·

Ich was dvrch wnder vs gevarn·
do vant ich wunderlichú ding·
ich vant die stvͤle leider lere stan·
da wisheit adel vnd alter
gewaltig sassen e·
hilf frowe maget· hilf megde barn·
den drin noch wider in den ring·
la si niht lange ir sedeles irre gan·
ir kumber manigvalt
der tůt mir von herzen we·
es hat der tumbe riche nv ir drier stůl ir drier grůs·
owe das man dem einen an ir drier stat nv nigen mv̊s·
des hinket reht· vnd truret zuht vnd siecher schame·
dis ist min klage noch klagte ich gerne me·