|
unbekannt: Von dem christenlichen streyt geschehen jm. M.CCCCC.vj. Jar zu Lißbona ein haubt stat in Portigal zwischen den christen vnd newen christen oder jüden, von wegen des gecreutzigisten got |
|
|
zu im / sagten weystu nit das dich alle welt sucht zu fahen vnd zu tödten / saget er schweyget lieben freundt vnd helfft mir daruon / ich wil euch geben tausent duckaten oder was ir haben wolt / helft mir nür mit dem leben daruon vnd beleydt mich biß geen sancta Maria de paradiso ist ein kirch gleich vor der stat / do was des kunigs gubernator / ist der oberst nach dem kunig / der die stat regiret der het bey im vierhundert man / vnd wo der Mastarenus do hin komen were / so wer er mit dem leben daruon kumen das dan got nit wolt solichs geschehen lan / also wardt der von denn vier manen nit weyt gefurt / vnd bey sant Juliana Kirchen do beschrey in ein jungs kleinß meydlein / vnd rufft vber laut zu dem vierden mall / do geet der mastarenus / nun het er sich verkleidt das man in nicht wol kennen kunt / do kam ein weyb die ryß im sein deck oder duch von kopff / als hie zu tragen gewonet ist / vnd schrey auch zu mermalen vber laut das ist der mastarenus / vnd machet ein geschrey das alle welt zu lüff / vnd einer von den vieren der setzt im ein blechens hewßlein auf / vnd rucket ims fur das angesicht / do mit man in nit kennen solt / vnd er het sich gantz verkleydt halff in aber alles nicht / das volck lüff zu vnd wolten in nür todt haben / sagten die vier ir solt im bein an thun / wann so man als bald erstech wurdt ein groß mürblen vnder dem volck / wir wöllen in zu gefangen furen zu dem gubernator wann vnder dem gemeinen volck einer wolt in gefangen haben der ander todt do sprang einer her fur der sprach. Ich glaube in got nit wan diser Jüdt weytter gefurt wirt er muß sterben / dann solt weyter gefurt werden so wurd er mit dem leben daruon komen / das wol got nit / vnd hieb im als bald ein grosse wunden in das angesicht darnach einer nach dem andern die vier hetten in geren beschutzt es war aber kein beschutz do noch verhanden / sunder yderman lüff zu / man vnd weyb jung und alt in zu sehen / vnd todt zu schlahen das geschach in einer gaffen genant differia / hinter einer kirchen heyst sant Maria de Conception do man in dan zu todt schlug / Vnd also todt schleyfften sie in herfur auff die rwa noua do lüff alle welt zu als ob es das wunderbarlichst ding were dz man ye gesehen het / dann yderman zu luff in zu sehen vnd todten vnd alle welt stach vnd hieb im nach seinem leyb, wer im nit ein
unbekannt: Von dem christenlichen streyt geschehen jm. M.CCCCC.vj. Jar zu Lißbona ein haubt stat in Portigal zwischen den christen vnd newen christen oder jüden, von wegen des gecreutzigisten got. Weißenburger, Nürnberg 1506, Seite 7. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Von_dem_christenlichen_streyt.pdf/7&oldid=- (Version vom 19.11.2023)
