kor dem selben sy vil guotes beweiset hat.
AGnes ain tuge[n]thafte andechtige fürstin ain tochter hern Leüpolds des ernreichen hertzogs zuo österreich vn[d] ze Steir / vn[d] fraw Theodoren seiner gemahel / die verheirat hertzog Lewpold vo[n] österreich ir vater / aine[m] hertzogen von saxsen Ob aber die bemelt fraw Agnes mit dem bena[n]ten hertzogen von saxsen irem gemahel kinder gehabt hab oder nit / wan sy gestorben ist Auch wa sy begraben ligt vindt man in der Sexischen Croniken.
COnstancia ain schöne gerade fürstin ain Tochter hern Lewpolds des erenreichen herzogs zuo österreich vn[d] steir / vn[d] fraw Theodora seiner gemahel / die warde v[er]mahelt durch hertzog Fridrichen de[n] streitpern iren bruoder hern heinrichen marggrafen vo[n] meyssen / bey de[m] het fraw Constancia ij sün Dietrichen vn[d] Albrechte[n] / der ainer solte hertzog zuo österreich worden sein nach abga[n]g hertzog Fridrichs ires vetern aber künig Otacker vo[n] Behem / vn[d] künig Wentzla sein vater vnderstuondens / fraw Constancia ableibung vn[d] begrebnuß vindt man in der meissischen Croniken.
GErdraut ein frume senftmüetige furstin ain tochter herren Lewpolds des ernreiche[n] hertzogs zuo österreich vn[d] ze steir vn[d] fraw Theodoren seiner gemahel die warde vermehelt ainem landgraffen von Türingen Ob aber fraw Gerdraut mit dem bemelte[n] landgraffen vo[n] Türingen irem gemahel kinder gehabt hab oder nit / wan sy gestorben ist vnd wa sy begraben ligt vindet man in der Türingischen Croniken
REykhart ain wolgestalte beschaidne fürstin ain swester landgraff Ludwigs vo[n] Türing der da gewesen ist ain gemahel sant Elspeten die bemelt fraw Rykhart v[er]heyrat ir bruoder landgraff Ludwig her heinrichen vo[n] medling dem grausamen anno nach cristi gepurd M.cc. vn[d] lxxv iar vn[d] hertzog heinrich hette mit der bemelte[n] fraw Rykharte[n] ain fürstliche hochzeit inn der stat Nüernberg vn[d] fraw margreth sein swester hette auch auf de[n] selben tag hochzeit ze Nüernberg / mit kü[nig] heinrichen de[n] Rö[mer?] fraw Rykhart hette mit irem gemahel hertzog heinrichen ain ainige tochter / gena[n]t Gerdraut fraw Rykhart ligt begraben zum heilige[n] kreütz im closter bey fraw Gerdraute[n] vo[n] Praunsweig ir Swegerin vn[d] sy ward gena[n]t Rikhart landgrefin von Walterstarff.
Gerdraut ain ma[n]liche vnerschrockne fürstin ain tochter herzog heinrichs vo[n] medling des grausam vn[d] fraw Rykhart seiner gemahel die warde v[er]heyrat vmb frids wille[n] der land österreich behem vn[d] merhern Wladislaen marggrafen vo[n] merhern durch herzog fridrichen vo[n] öster[reich] iren veter d[er] bena[n]t wladisla warde hertzog ze öster[reich] vo[n] wegen seiner gemahel nach herzog fridrichs tod / vn[d] er lebte nit lang vn[d] hett auch nit erben bey seinem gemahel / nach des ableibu[n]g na[m] fraw Gerdraut her herma[n] marggrafen zuo baden / der besass wien vn[d] etlich ander stet in öster[reich] vn[d] lebte auch nit lang vn[d] ligt begraben zuo Closternewburg im Closter / verließ ain sun hies Fridrich / der warde zuo Nappels anthaubt / vn[d] ist da selbs begraben / vn[d] ain tochter gena[n]t Agnes Nach hertzog herma[n] nam fraw Gerdraut iren dritten man hern Roman künig vo[n] Reüssen der verließ sy swanger zoch wideru[m]b haim in Reüssen vn[d] sy gesach in nicht mer Aus dem gepar sy ain tochter gena[n]t maria / fraw Gerdraut layd vil übels von künig Otacker der österreich regieret vnd zoch gen meyssen zuo ir müemel Constancia
Ladislaus Sunthaym: Der löblichen Fürsten und des Landes Österreich Altherkommen und Regierung. Basel (bei Michael Furter) 1491, Seite 43. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Sunthaym_Der_l%C3%B6blichen_1491_43.jpg&oldid=- (Version vom 1.8.2018)