zaychen das heiligen kreütz / vnnd zoch mit herrn Andre dem andern künige ze hungern[1] vn[d] vil ander fürsten vn[d] herren über mer / vnd komen in xvj tagen für die stat Damiata[2] gelegen in Egypten / das doch vor selten erhört was / in so kurtzer zeit über mer zuoschiffen / vnd belegerten die bemelte stat Damiata da durch die hayden auß forcht vil stett vn[d] slösser da selbs verliessen vnd auspranten / vn[d] die obgena[n]t stat Damiata ward also durch schickung des almechtige[n] gottes von den obgenante[n] Cristenlichen fürsten gewunen / Nach cristi gepurd M.cc. vn[d] xix iar / vn[d] hertzog Lewpold kame desselbe[n] iars seligclichen mit grossen freüden widerumb gen Wienn / Darnach nach cristi gepurd M.cc. vnd xxviij iar / gab herr Heinrich Rö[mischer] künig kayser Fridrichs ander sun de[m] benanten hertzog Lewpolden von österreich seine[m] sweher auf das hertzohüttl / die kayserlichen pogn / der benant hertzog Lewpold hat dem Closter zuo Geyrach[3] karthuser ordens in der Steiermarch gelegen vil guottes beweist / Er ist auch gezogen gen pülln[4] / nach cristi gepurd M.cc. vn[d] xxx iar / zuo willen kayser Fridrichen dem andern / vnd pabst Gregorien dem neünten sy bayd zuouerainen / dz er auch getan hat mit sambt herr Berchtolde[n] patriarchen zuo Aglay / hern Eberharden Ertzpischofen zuo Saltzburg ain pischoff zuo Passaw / vn[d] hern Herma[n] hertzogen zuo Kernden vnd ander fürsten / Vnd der benant hertzog Lewpold starb pald nach der bericht / in dem land Pülln / in ainer stat genant zuo Sant German / vn[d] sein ingewaid warde begraben in dem Closter gana[n]t mons Cassinus[5] sant Benedicten orden / Aber sein gepain ward herauß gefürt gen österreich in sein Closter Lilignfeld / vnd ward da selbs im kor begraben / in ainem schönen erhebten mermelstaine[n] grab / Vn[d] der bemelt hertzog Lewpold hat geregiert das land Steyr in guotem frid xxxvij iar / Auch dz land österreich gar loblich auch in guotem frid bey xxxj iarn / Vn[d] hertzog Lewpolds gemahel fraw Theodora ligt begraben in dem gotzhaus zuo Closternewburg im kor.
b. [Heinrich II. der Jüngere, Herzog von Mödling]
HEinrich gena[n]t vo[n] medling d[er] jünger[6] ain schöner vernünftiger iunger fürst / hern Heinrichs vo[n] medling des elltern ainiger sun / dem wz wol mit aller waydmanschafft Vn[d] hielt sein fürstlichs geseß auf der purgk Medling / vnd besaß die güeter vnder dem gepürg mit iren zuogehörungen die sein vatter innen hielt / Vn[d] fieng die selben herschaftn vn[d] güeter an zuo regieren Als ma[n] zalt nach cristi gepurd M.cc. vn[d] xxiij iar zehand nach abgang seines vatern seligen / vn[d] regieret die selben güeter etliche iar gar ersa[m]clich / vnd verschied an leibs erben Vnd ward begraben zuo Closternewnburg im Closter.
c. [Leopold das Kind]
LEwpold genant das kind / ain schöner wolgestalter iunnger knab bey ix iaren / herrn Lewpolds des ernreichenn hertzogen zuo österreich vnd zuo Steir erstgeborner sun / ward geboren zuo Closternewburg Als man zalt nach cristi gepurd M.cc. vnd vij iar / an vnser lieben frawen tag der verkündu[n]g / vn[d] gieng gen schuol zuo Closternewburg / Vnd auf ain zeit ward der benant Lewpold von seinem schuolmaister geweiset in ain paumgarten da selbs zuo Newburg / vn[d] auß vnfleyß des schuolmaisters / stayg der bemelt knab auf ain Spenling paum vn[d] viel sich ab dem selben paum zuo tod /
- ↑ Andreas II. (um 1177–1235)
- ↑ Damiette/Dumyāt
- ↑ Karthäuserkloster Geyrach (a. Gairach, Gayrach) in Untersteiermark, heute Jurkloster in Slowenien
- ↑ Apulien
- ↑ Kloster Monte Cassino
- ↑ Heinrich II. der Jüngere (1182–1236), Herzog von Mödling
Ladislaus Sunthaym: Der löblichen Fürsten und des Landes Österreich Altherkommen und Regierung. Basel (bei Michael Furter): –, 1491, Seite 25. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Sunthaym_Der_l%C3%B6blichen_1491_25.jpg&oldid=- (Version vom 1.8.2018)