bena[n]ten Fridrichen hertzogen zuo Swaben vn[d] mit Conradte[n] dem Römischen künig muoterhalben Vn[d] der bemelt sa[n]t Lewpold hielt sein fürstlichs geseß auf dem kalnperg[1] / vn[d] fraw Agnes starb nach sa[n]t Lewpolde[n] irem gemahel / vn[d] ligt bey im zuo Newnburg im capitel begraben Vnd sant Lewpold war gehailiget ze Rom vom pabst innoce[n]cio dem achte[n][2] / nach cristi gepurd .M.ccc. vn[d] lxxxv. iar an der hailigen drey künig tag / vnder der regieru[n]g kayser Friderichs des dritten vo[n] österreich[3] / des benanten sa[n]t Lewpolden tag man feiret am fünften tag nach sa[n]t Mertins tag / Verlies hinder im xi kinder vj. sün vn[d] v. töchter [etc.]
N. [„Poppo, Erzbischof von Trier“]
POpp ertzpischoff zuo Trier[4] / ain andechtiger ersa[m]er weiser fürst / herr Lewpolds des schön marggrafen in österreich ander sun vn[d] ain bruoder des hailigen sant Lewpolds / vn[d] als der bemelt sa[n]t Lewpold von den hungern behemen vn[d] pairen seinen veinten fast beschediget ward an land vnd leüten / Rüffet an den benanten seinen bruoder umb hilf / der im dan sendet herren Atzo[5] sein gebornen freündt / der dann ain mechtiger edler herr was / Vnd ain vermerter manlicher kriegßman mit ainer mercklichen ritterschaft / vnd do der bemelt herr Atzo gen österreich kam / doward er gar ersamlich mit grossen freüden von sant Leüpolden empfangen / vn[d] machet in ze marschalh des landes / vnd als die veinde des landes / dasselb ze beschedigen kamen / da macht sich herr Atzo auf vnd sant Lewpold mit im / vnd sy erschluogen d[er] veint mit ainem klainen volck ain vnzalbare menig / vnd brachten die veint inn die flucht / der vil aus in in dem wasser genant die marich ertrancken Also wardt das land österreich in frid vnd gemach gesetzt / Dar nach wardt der bemelt herr Atzo durch sant Lewpold verheyrat vn[d] erbschenck des landes gemacht / Vnd von herren Atzo sindt geporen vn[d] komen / die herren von kienring. von sun[n]berg. von valckenberg. von püchperg. von mistlpach. die winckler. vo[n] volkenstorff. von schönberg. von starckhenberg. vo[n] liechtenstain. von pottendarf. vo[n] perchtoltzdarf. von weitra. von tiernstain. von walsee. von krey. von wittingaw von kranichperg. von capell. von hackenperg. die von ottenstain. von velsperg Vnd andre mechtige geschlecht / der nun vil aus in abgestorben sein / vnd der bemelt pischof Popp regieret sein ertzpischumb zuo Trier vil iar gar loblich in guotem frid / vnd ligt da selbs zuo Trier begraben [etc.]
O. [Adalbert der Fromme]
ALbrecht[6] genant der andechtig des heiligen Sant Lewpolds marggraffen in österreich erstgeborner sun ain frumer ersamer fürst / Vnd ain vogt des gotzhaus Closternewnburg / auch ander kirchen vn[d] gotzhewser des landes österreich / Het zuo gemahel Bela des plinden künig zuo hungern swester[7] vnd kain kind mit ir Vn[d] als künig Bela sein swager mit hertzog Boricio[8] Steffans, des andern künig zuo hungern[9] bruoder / vatterhalben kriegt / kam der benant Albrecht dem egemelte[n] künig Bela mit sambt ander seiner Ritterschafft aus dem land österreich zehilf / vn[d] als der egenant Boricius erhöret in dem ersten hauffen künig Belas die menig der tütschen / begund er sich zefürchten vn[d] nam die flucht mit sambt dem hertzogen von Polan der im zuohilf gezogen was / vn[d] in der selben flucht vil volckes des benanten hertzogen Boritzen erdruckt vnd erschlagen warden Also behielt künig Bela /
- ↑ Leopoldsberg bei Wien, bis 1693 Kahlenberg genannt
- ↑ Papst Innozenz VIII. (1432–1492)
- ↑ Kaiser Friedrich III. (1415–1493)
- ↑ eine fiktive Person
- ↑ Azzo von Gobatsburg, legendärer Ahnherr des österreichischen Ministerialengeschlechts der Kuenringer
- ↑ Adalbert „der Fromme“ (1104/05–1138), Vogt des Hochstifts Passau
- ↑ Heilwig oder Hedwig, Schwester des ungarischen Königs Béla II. (um 1110–1141), der von seinem Onkel und Vorvorgänger König Koloman geblendet worden war
- ↑ Boris, Sohn König Kolomans von zweifelhafter Legitimität
- ↑ Stephan II. (um 1101–1131), König von Ungarn, Sohn und Nachfolger Kolomans sowie Vetter und Vorgänger Bélas II.
Ladislaus Sunthaym: Der löblichen Fürsten und des Landes Österreich Altherkommen und Regierung. Basel (bei Michael Furter): –, 1491, Seite 16. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Sunthaym_Der_l%C3%B6blichen_1491_16.jpg&oldid=- (Version vom 1.8.2018)