Durch die gnade des almechtigen gots vmb das gebete vil erberger personen zupesserung vnd zyrungen den gepewen der heyligen cristenlichen kirchen zutrost vnd vntterweysung vnnserm nachsten vnd allen maisteren vnd gesellen die sich diser hohen vnd freyen kunst der Geometria geprauchen ir gemute speculirung vnd ymaginacion dem waren grunt des maswercks paß zuuntter werffen nach gedencken vnd ein zu wurtzeln. Auch fundamentlicher die art so auß dem Centrum des zirckels mitsamt seines vmbschweiffs warer saczung punct vnd aufteylung dest freyer vnd warhafftiger eingepflanczt vnd gegrundt werden. Vnd nit vmb meiner eygen Ere willen. Sunder mer zupreyse rum vnd lob der altten vnnser vorgeer seczer vnd vinder diser hohen kunst des pauwercks die auß der wage. winckelmoß. triangel. zirckel. vnd linial. vrsprunglichen iren waren grunt haben. vnd nu mit der scherff. subtilitet. hoher synne. vnd tieffer rechnung. yecz ersucht ist. Hyrumb hab ich Hanns schmuttermayer von Nurmberg die art solichs maswercks. virung. rotund. der violn. winperg. vnd der pfeyler mit aller irer zugehorungen auff die new mitsamt der altten art gerecht gemacht vnd hynein pracht nach aller irer aufteylung auff das verstentlichst. doch nit mit zukurczer beschreibung noch mer wortten dann not ist. Vnd hab solichs auß mir selber nit erfunden. sunder von vil andern grossen berumbten maisteren. Als die Junckhern von prage. Maister ruger. Niclas von straspurgk. Der dan am mainsten die new art an das licht gepracht mitsamt vil andern genomen.
Hans Schmuttermayer: Fialenbüchlein. , Nürnberg 1489, Seite 3. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Schmuttermayer_Fialenb%C3%BCchlein_003.jpg&oldid=- (Version vom 4.5.2023)
