| — 26 — |
do sie nit wider da hin quamen,
da in ier schiffung was bereit,
Als er nun wider schied von dennen,
die schiff det er in grunt verprennen.
Ier sinn staind heim durch gross verlange,
der leuchtet stern was in entgangen;
Von Herodes ward in vil geseth.
Vnder wegen plibent sie zwei iar,
Gar weit ist das wunder offenbar,
da komens erst wider heim zu land.
da bawtens ein Capel mit ierem here
Wol in des Kunigs der Juden er,
den in der stern het don bekant
Gar vere in dem Judischen land.
zu grosser gedechtnus is sie verbracht.
Auff der Saul ein sternn bin ich bericht;
dar in stet eines kindes angesicht,
Ein zeichen des creutz darauff, ist war,
den treyg Kuninge vnd anderen mer,
Dar durch versamlet ein grosses her
zu Bethlahem vnd nach vil nacion:
Die zeichen duet man dar bey verston.
Darab verwundert sich arm vnd reich. —
Als nun sant Thomas der zwolf Both
Von goth erluchtet on allen spoth,
In christlichem glauben gegrundeth,
Da hub er an zu predicieren
Vnd den christlichen glauben leren,
Deth in verkunden Christus geburt,
Auch wie er enpfangen von einem wort,
Gen himel faren vnd wider kon.
Das euangelium er leret,
Dar durch der christlich glaub gemereth.
Als sie sein predig hettent gehort,
Darin abgoterey betriben,
Kein liessens in dem land nit pleiben.
