Seite:Literarischer Verein Stuttgart IX 184.png

	Verschiedene: Bibliothek des Literarischen Vereins in Stuttgart (Band IX)

97.

Sich hvp ein vngevuͤget^[1] zorn(H. 1, 308^a)

von gv̊ten vrivnden vmbe ein wip.
nv hant si beide vf mich gesworn
dc herze wider minen lip.
dem herzen wolden dv͛ ǒgen helfen minnen.
da wider strep^[2] der lip mit allen sinen sinnen
nv hant si mich dar zv geladen
ine weiz wes ich mich vnderwant. dc ich si sv̊nde vf minen scha den.

98.

Zehant do si versv̊nden sich

dvr minen willen (Bl. 19^b) als ich si bat.
do tetes vbel wider mich
dc si mich von der selben stat.
nie liezen wider wenken noch gewenden
ich lop^[3] in dc ich hvlfe ir not volenden
dc han ich vf ein dinc getan.
obe wir gewinnen des wir gern dc si mich danne teilen lan.

99.

Si git vns iemer vroiden vil

gewinnen wir dc beste wip.
nv hoͤret wie ich danne teilen wil
dem herze herzeliebe lip.
ir sinne die bescheide ich minen sinnen.
ir ǒgen aninen^[4] ǒgen al zeminnen
si selben wil ich haben mir
ze wunneclicher stetekeit vnd wil mich selben geben ir.

100.

Wan dc ich minnecliche tobe(H. 1, 308^b)

so bin ich niht wol sinnic man.
dc ich mit^[5] selbem dc gelobe
des si mir liehte niet engan.
mir wer eht liep dc mir vil wol geschehe
vnd dc si mich von herzen gerne sehe
dc sol si lazen ane haz
ez schat ir niht vnd tv̊t mir wol mir ist die wile deste baz.^[6]

1. L. ungevüeger.
2. L. strebt.
3. L. enlobt.
4. L. minen.
5. Lies mir.
6. Die Strophen 97–100 stehen in der Pariser Hs. unter Walther von Mezze.

Empfohlene Zitierweise:
Verschiedene: Bibliothek des Literarischen Vereins in Stuttgart (Band IX). Stuttgart, 1844, Seite 184. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Literarischer_Verein_Stuttgart_IX_184.png&oldid=- (Version vom 7.1.2019)