da wirt daz vngemv̊te kranc
swa minneclicher minne kvs so lieplich liep an ander tv̊t
swer sich so wunneclich. etc.[WS 1]
so selten nach der eren sige. daz ich niht vrevde mac veriehen.
vil selic man der des niht clagit.
vnd ime sin herze mac sagen. waz ime zeleide ist geschehen.
swer sich so wunne. etc.[WS 2]
den wer dv͛ minne uvͤgen kan. wie rvchet der daz herze enbor.
dv͛ beide ir mv̊tes sint al ein
ich kan nach wunsch erdenken niht zer welte selde dirre vor.
swer sich so wunne. etc.[WS 2]
von liebe liep ez mv̊z eth sin. wol vf laz ir daz herze hie.
dv͛ din ze frv͛nde hat gegert.
si wil och dir ir herze lan. dv͛ trvwen dir gewankte nie
die leist och ir als ez din werder lip vil wol geleisten mac
mit schiere komenne ez mac niht langer hie gesin ich sihe den tac.
wil ich dienen vf ir selichechen[2] trost.
waz kan sich gelichen
dem den vreude vz senenden sorgen hat erlost.
der nie not nach herzeclicher liebe erleit.
der kan och niht wissen waz gelvcke wunnenclicher wunne git zů werdekeit.
sich so gv̊tet vnd meret alle tage
so mv̊z min gemv̊te
sin gehoͤhet vf den trost dc ich beiage
lieplich liep nach leide also daz si mir gebe
minneclich ir grv̊z. we wie vrolich ich danne al min langes trvren wider lebe.
Anmerkungen (Wikisource)
Verschiedene: Bibliothek des Literarischen Vereins in Stuttgart (Band IX). Stuttgart, 1844, Seite 167. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Literarischer_Verein_Stuttgart_IX_167.png&oldid=- (Version vom 7.1.2019)
