Seite:Hugo Martina 1856 0712.png

Fertig. Dieser Text wurde zweimal anhand der Quelle korrekturgelesen. Die Schreibweise folgt dem Originaltext.

	Hugo von Langenstein: Martina

Libes vnd der sele heil

5

Daz han ich wol befunden

Selbe ze mengen stunden

Ir genade mich gewerte

Dez ich svnder an si gerte

Ich tuon als dem div gans wart

10

Vnd rat in allen vf die vart

Da mit ist wol gelungen

Den alten zvo den iungen

Man vindet si genaden vol

Daz weiz ich ane zwivel wol

15

Wol her swer tobende rase

Mit dekeiner svnden mase

Wer sol werden reht gesunt

Ober zvo ir grabe kvnt

Ir svnt balde lovfen

20

Ane guot genade kovfen

Si was e miltes muotes

Der welte varndes guotes

Nv mac si wol milte sin

Sist eines kvnges kamererin

25

Dem ez ane schaden lit

Swie vil guotes si hin git

Swie vil man si gebin siht

Er het och deste minder niht

283b,29

Nv kerent zvo der suozen

30

Si kan wol kvmber buozen

Sist mit froden vber laden

Wol her habe ieman schaden

An fuozin oder an henden

Daz wil div milte wenden

35

Si tuot wol vf div oren

Den vngehœrenden toren

Wol her ir sunde siechen

Die weder gan noch criechen

Mvgen von svnden wunde

40

Die wil si wol gesvnde

Mit ir genade lazin varn

Und sich die e waren arn

Nv lovfent vil vntrage

Zvo disem heilawage

45

Den vns got hat gegebin

Er heilit lip vnde lebin

Er heilit sele vnde muot

Er ist bezzir danne guot

Empfohlene Zitierweise:
Hugo von Langenstein: Martina. Hg. von Adelbert von Keller. Stuttgart 1856, Seite 712. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Hugo_Martina_1856_0712.png&oldid=- (Version vom 18.8.2016)