Seite:Hugo Martina 1856 0692.png

Fertig. Dieser Text wurde zweimal anhand der Quelle korrekturgelesen. Die Schreibweise folgt dem Originaltext.

	Hugo von Langenstein: Martina

Und ist dirre armen welt

Gar frovmde vnde tiure

Die werden trahte vil gehiure

Lat ivch nennen vnde sagen

10

Ir hohen wirde niht verdagen

Div also suoze spiset

Lip vnd sele si priset

Ir name si iv svz geseit

An alle vorhte sicherheit

15

Zahi waz div frovden git

Wan hie ist vorhte elliv zit

Er muoze in kvmber sterben

Mit dem tode verderben

Hie æzet vf der hiute

20

Div welt die tumben liute

Und machet siv so azgeil

Daz siv vergezzint ein teil

Daz siv mit iamers leiden

Von hinnan muozen scheiden

25

Diz ist ein gemeiner lovf

Wir han dez todis winkovf

Getrunken daz ich selbe weiz

Owe daz ich sin ie enbeiz

275b,29

Der tot ist vnser nach gebur

30

Sin gehugde ist gar sur

Vil luzil froden dem gezimet

Swer in in sine gehugde nimet

Er het ein so scharpfes ort

Und tuot allen froden mort

35

Weder alt noch iunge

Hant hie stete wonunge

Als och sant paulus giht

Hie ist stetes wesin niht

Ein stetes wesin wir suochen

40

Wol in die dez geruochen

Da man iemer alle frist

Ane vorhte sicher ist

Daz ist div stat froden vol

Da niemer herze getruren sol

45

Da ist steteclichen tac

Kein herze betrahten mac

Den hort den froden vngezalt

So div stat hat mit gewalt

Kein vient mac ir geschaden

50

Noch kvmber vf si geladen

Empfohlene Zitierweise:
Hugo von Langenstein: Martina. Hg. von Adelbert von Keller. Stuttgart 1856, Seite 692. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Hugo_Martina_1856_0692.png&oldid=- (Version vom 18.8.2016)