Seite:Hugo Martina 1856 0675.png

	Hugo von Langenstein: Martina

30

Die ir hofart dannan schiet

Si hat zvo dem libe

Me danne ich nv schribe

Frvntschaft vnde er zvo ir

Mit vnzerganclicher gir

35

Darzvo mit minnen crefte

Zvo der engel geselleschefte

Und zvo allem ingesinde

Daz bi der megde kinde

Lebt in froden ane zal

40

Mit einer minne vberal

Nv horent och daz dritte

Daz ist da steter sitte

In der himelschen zelle

Div ein mvotic eben helle

45

Div och niemer wanc genimet

Als gottes gesinde gezimet

Div vierde selde ist ere

Div ist grozzir vnde mere

Danne alle sinne getrahten

50

Kvnnen oder gepfahten

Die got der sele hat gewidempt

Daz si von wunderunge erbidempt

Vnd si kvme erliden mac

Uon der wunderunge beiac

55

So ist gewalt daz fiunfte

Wan si het signunfte

268c,57

An dem libe genomen

Ir gewalt ist vollekomen

Mit dem si dicke hie gebiec

60

Der hat gelazen sinen criec

Daz ist der vil cranke lip

Ez si man oder wip

So wirt der lip dem geiste

Mit vnderteniger volleiste

65

Gehorsam zehimelriche

Daz ist reht vnd billiche

Der lip gar ane villen

Tuot da der sele willen

Siv hant gemeine vnder in

70

Einen muot einen sin

Der sele sehste selde dort

Ist sicherheit der hohe hort

Si ist sicher ane wan

Daz si sol bi got bestan

Empfohlene Zitierweise:
Hugo von Langenstein: Martina. Hg. von Adelbert von Keller. Stuttgart 1856, Seite 675. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Hugo_Martina_1856_0675.png&oldid=- (Version vom 18.8.2016)