Seite:Hugo Martina 1856 0665.png

Fertig. Dieser Text wurde zweimal anhand der Quelle korrekturgelesen. Die Schreibweise folgt dem Originaltext.

	Hugo von Langenstein: Martina

Ez bringet suften vnde clage

Als ir wol sehint alle tage

Von dem sehzten alter hœret

Daz muot vnd frovde storet

35

Daz ist decrepita genant

Daz vnser craft tuot geswant

Wan ez siget zvo der erde

Und machet vns vnwerde

Den brvoder zvo der swester

40

Hivte vnliebir danne gester

Vnd gat von ahzic iaren och

Biz daz der menschelich govch

Uon disem lebene slichet

Vnd der tot an im gerichet

45

Doch ist der selben niht vil

Die doch vf ahzic iare zil

In disen selbin ziten tretten

Si habe der tot e entwetten

Daz alter mengem hat gebogen

50

Sinen ruggen vnd gesmogen

Zesamen vnde sinv lider

Da horet kein arzenie wider

Der vatter wirt dem kinde

Uon alter leides ingesinde

55

Wan ez vil gebresten hat

Sin gewonheit ez niht lat

264c,57

Swie vil der alte froden siht

Daz kan doch vervahin niht

So truobet ie sin herze

60

Dez alters bitter smerze

So er hie horit singen

Die iungen vnde springen

In ir besten mugende

Uon der blugender iugende

65

Div den alten so vngehure

Muoz iemer wesen ture

Dez alters menicvaltiv not

Die ez der welte ie bot

Han ich da vor gekvndet

70

Vnd also gar ergrundet

Da von so machis kvrz

Wan ez ist ein bitter wurz

Dez man doch vil gemeinlich

Begert offenlich vnd heinlich

75

Die iugent ez machet sure

Empfohlene Zitierweise:
Hugo von Langenstein: Martina. Hg. von Adelbert von Keller. Stuttgart 1856, Seite 665. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Hugo_Martina_1856_0665.png&oldid=- (Version vom 18.8.2016)